შინაგან საქმეთა მინისტრის, ვახტანგ გომელაურის განცხადებით, თუ მძარცველი ოკუპირებულ აფხაზეთში გადავა და მას თბილისს გადასცემენ, კარგი იქნება. ამის შესახებ მან ჟურნალისტებს განუცხადა.

"თუ გადმოგვცემენ ძალიან კარგი იქნება, თუ გადავა იქით, მაგრამ ვნახოთ გადავა თუ არა, ეს სხვა თემაა", — განაცხადა მინისტრმა.

მედიაში გავრცელებული დაუზუსტებელი ინფორმაციით, ბანკის მძარცველი შესაძლოა ოკუპირებულ აფხაზეთში გადავიდა. სოხუმში მძარცველის მიერ ე.წ. საზღვრის გადაკვეთას არარეალურს უწოდებენ, თუმცა მისი დაკავების შემთხვევაში მზად არიან დამნაშავე თბილისს გადასცენ.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: