ევროპული საქართველოს საარჩევნო შტაბის ხელმძღვანელი, სერგი კაპანაძე,
ევროპარლამენტის გადაწყვეტილებას ეხმაურება, რომ ის საქართველოში
დამკვირვებლებს არ გამოგზავნის.

კაპანაძის თქმით, მიუხედავად ამისა, საქართველოში არჩევნებს დააკვირდება სხვა
ბევრი საერთაშორისო დამკვირვებელი, რომლებიც უკვე ახორციელებენ გრძელვადიან დაკვირვებას. კაპანაძემ აღნიშნა, რომ ოპოზიციური პარტიების საერთო
შტაბიც აქტიურ მონიტორინგს გაუწევს არჩევნებს და თითოეული ამომრჩევლის ხმა
იქნება დაცული.

"გაყალბების თავიდან ასაცილებლად იქნებიან კონკრეტული პოლიტიკური
ძალები, მათ შორის, ევროპული საქართველოს მხრიდან იქნება ძალიან ბევრი
დამკვირვებელი. იქნება ძალიან ბევრი წარმომადგენელი ყველა უბანზე. ასევე, წევრები და საერთო შტაბი, რომელიც შექმნილი გვაქვს ოპოზიციურ პარტიებს, იქნება იმის გარანტი, რომ არ მოხდება არანაირი მანიპულირება არჩევნების დღეს. ამიტომ, მნიშვნელოვანია, რომ რაც შეიძლება მეტი ადამიანი მივიდეს. მათ მიერ ჩაგდებულ ბიულეტენებს, რომ არანაირი საფრთხე არ დაემუქრება, ამის გარანტი ვიქნებით ჩვენ", — განაცხადა კაპანაძემ.

მისი თქმით, ყველა ჩაგდებული ხმა იქნება დაცული და ამაზე პასუხს აგებს, როგორც ევროპული საქართველოს მხრიდან, ისე სხვა ოპოზიციური პარტიების მხრიდან.