მარგვეთისა და უბისის ეპისკოპოსი მელქისედეკის თქმით, როცა სინოდის წევრი ე.წ. კარტოგრაფების საქმეში გარკვეული არაა, რიგითი სასულიერო პირი ამაზე არ უნდა საუბრობდეს. ამის შესახებ მან ჟურნალისტებს მცხეთაში განუცხადა, სადაც სვეტიცხოვლობას აღნიშნავდნენ.

"მე მართლა ბოდიშს ვუხდი ამ ხალხს, ამ ორ ადამიანს [ივერი მელაშვილსა და ნატალია ილიჩოვას] ასეთი დამოკიდებულების გამო. მე ვერ გავერკვიე, რა ხდება. მე იმას ვამბობ, როცა წმინდა სინოდის წევრმა არ ვიცი, რა ხდება, ამავდროულად, საქართველოს ეკლესიის რიგითი სასულიერო პირი საუბრობს ამ თემებზე, ჩემთვის ეს მიუღებელია", — განაცხადა მეუფე მელქისედეკმა.

გარდა ამისა, იგი ამბობს, რომ იმ ინფორმაციაზე დაყრდნობით, რასაც ტელევიზორიდან იღებს, დანაშაულის ნიშნებს ვერ ხედავს.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასამთავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: