საქართველოს პრეზიდენტის ადმინისტრაციამ ზურაბიშვილის განცხადება გამოაქვეყნა, რომელიც ამბობს, რომ დავით გარეჯის ირგვლივ შექმნილი ვითარება პრეზიდენტის ინსტიტუტის დასუსტებისკენაა მიმართული.

"იმის მიუხედავად, რომ ჩემს ბოლო სატელივიზიო ინტერვიუში აღნიშნულ საკითხზე ამომწურავად ვისაუბრე, ხელოვნურად კვლავ იქმნება ფონი, თითქოსდა ამ თემის ირგვლივ ჩემ მიმართ კითხვები კიდევ არსებობს", — განაცხადა სალომე ზურაბიშვილმა.

ზურაბიშვილის განცხადებით, გამოძიება 2006-2007 წლებში კომისიის მიერ მიღწეულ შეთანხმებას ეხება, და არა მისი საგარეო საქმეთა მინისტრობის პერიოდს (18 მარტი 2004 - 19 ოქტომბერი 2005).

მიუხედავად ამისა, აღნიშნა, რომ საჭიროდა მიიჩნია, საჯაროდ გაეზიარებიან მის ხელთ არსებული ინფორმაცია და შეუძლია, ეს ინფორმაცია პროკურატურასაც მიაწოდოს.

"ჩემი მინისტრობის პერიოდში, სახელმწიფო საზღვრების საკითხი ნამდვილად იყო ჩვენი ორმხრივი დღის წესრიგის ერთ-ერთი მნიშვნელოვანი საკითხი, როგორც აზერბაიჯანელ ასევე, სომეხ კოლეგებთან შეხვედრების დროს. მიმაჩნდა და მიმაჩნია, რომ საქართველოს სახელმწიფოსთვის და მისი ევროატლანტიკური მისწრაფებისთვის საზღვრების სამართლებრივ დადგენას დიდი მნიშვნელობა აკისრია. აქედან გამომდინარე, ჩემი მინისტრობის პერიოდში, კომისიამ ორივე მიმართულებით იმუშავა, თუმცა, საბოლოო შეთანხმება ვერცერთ მხარესთან ვერ იქნა მიღწეული", — აღნიშნა პრეზიდენტმა.

მისი თქმით, აზერბაიჯანის საგარეო საქმეთა მინისტრთან მისი ბოლო შეხვედრისას კომისიიდან მიიღო ინფორმაცია, რომ საზღვრის რამდენიმე მონაკვეთი შეუთანხმებელი რჩებოდა, მათ შორის, იყო დავით გარეჯისა და წითელი ხიდის მონაკვეთები.

"საკითხის მაღალი პოლიტიკური მნიშვნელობიდან და სენსიტიურობიდან გამომდინარე, ჩემს კოლეგა ელმარ მამედიაროვთან ერთად, შევთანხმდით, რომ გადაწყვეტილების მისაღებად მიგვემართა ქვეყნის პრეზიდენტებისთვის, რამეთუ საკითხის გადაჭრა, მხოლოდ უმაღლეს პოლიტიკურ დონეზე იქნებოდა შესაძლებელი", — განაცხადა სალომე ზურაბიშვილმა.

მისივე განცხადებით, არ ფლობს ინფორმაციას, მისი მინისტრობის შემდგომ პერიოდში პრეზიდენტებმა განიხილეს თუ არა აღნიშნული საკითხი. ასევე, პრეზიდენტის თქმით, მისთვის უცნობია, როდის ან რა პირობებში მოხდა საკითხის კომისიაში განსახილველად დაბრუნება.

მზად ვარ, ჩემს ხელთ არსებული ინფორმაცია მივაწოდო პროკურორს — ზურაბიშვილი გარეჯის საქმეზე