ქართული ოცნების ერთ-ერთმა ლიდერმა, გია ვოლსკიმ განაცხადა, რომ გარეჯის საქმესთან დაკავშირებული პასუხისმგებელ ადამიანთა წრე, სავარაუდოდ, გაიზრდება.

"თუკი დანაშაული არსებობს, რომ ამ ორ ადამიანს ეკისრა ის მძიმე შედეგების მქონე, გადაცდომაც არ ჰქვია, დანაშაული, რომელთანაც, სავარაუდოდ, გვაქვს საქმე, ვფიქრობ, პასუხისმგებელი ადამიანების წრე გაიზრდება", — განაცხადა გია ვოლსკიმ.

მისივე თქმით, ადამიანები, რომლებიც დღეს "ყველაზე ხმამაღლა გაჰკივიან", ის პირები არიან, რომლებსაც ყურადღება უნდა მიექციათ, რომ სახელმწიფოს მსგავსი ზარალი არ ჰქონოდა.

"ძალიან დიდ ეჭვს იწვევს, აქედან გამომდინარე არ მიკვირს, თუკი გამოძიება ზუსტად დაადგენს და მერე სასამართლო დაადასტურებს, რომ მართლაც სახელმწიფო ღალატს ჰქონდა ადგილი", — აღნიშნა "ოცნების" ლიდერმა.

აზერბაიჯანთან საზღვრის დადგენის საქმეზე დაკავებულ ივერი მოლაშვილისა და ნატალია ილიჩოვას აღკვეთის ღონისძიების სახით სასამართლომ პატიმრობა შეუფარდა.

ნატალია ილიჩოვას ადვოკატმა გირაოს სახით სასამართლოს 20 000 ლარი შესთავაზა, ხოლო ივერი მელაშვილის ადვოკატი მისი დაცვის ქვეშ მყოფის აღკვეთის ღონისძიების გარეშე დატოვებას ითხოვდა. რაც შეეხება ბრალდების მხარეს, იგი დაკავებულების მიმართ პატიმრობის გამოყენებას მოითხოვდა.

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო.

დაკავებულებს ბრალი სისხლის სამართლის კოდექსის 308-ე მუხლის პირველი ნაწილით წარედგინათ, რაც გულისხმობს საქართველოს საწინააღმდეგო მოქმედებას, რომელიც მიმართულია უცხო ქვეყნისათვის საქართველოს მთელი ტერიტორიის ან მისი ნაწილის გაცემისკენ ანდა საქართველოს ტერიტორიიდან მისი ნაწილის გამოყოფისკენ.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

ამავე თემაზე: