საქართველოს პრემიერმინისტრმა, გიორგი გახარიამ მთავრობის სხდომაზე იუსტიციის ყოფილ მინისტრ, თეა წულუკიანს "უაღრესად ნაყოფიერი 8-წლიანი შრომისთვის" მადლობა გადაუხადა და პარლამენტში წარმატებები უსურვა.

"მინდა მას წარმატებები ვუსურვო ახალ სტატუსში, პარლამენტში, სადაც, დარწმუნებული ვარ, რომ მისი მოღვაწეობა იქნება ასევე წარმატებული და ნაყოფიერი", — აღნიშნა გახარიამ.

გახარიამ ჩამოთვალა მიმართულებები, სადაც, მისი აზრით, თეა წულუკიანმა "მნიშვნელოვანი ღვაწლი და პროგრესი ანახა ქვეყნის განვითარებაში". მათ შორის: აღდგენითი მართლმსაჯულების სისტემის ჩამოყალიბება, დანაშაულის პრევენციის მექანიზმების დანერგვა, ბრალდებულთა და მსჯავრდებულთა რესოციალიზაციის და რეაბილიტაციის პროგრამების დანერგვა, "მთლიანად სისტემის უფრო მეტი ჰუმანურობისკენ გადადგმული ნაბიჯები", ევროსასამართლოში "მიღწეული წარმატებები". ასევე, არასრულწლოვანთა მართლმსაჯულების კოდექსს გახარიამ მთლიანად თეა წულუკიანის დამსახურება უწოდა.

"მინდა ხაზგასმით აღვნიშნო მისი პერსონალური წვლილი საერთოდ მართლმსაჯულების სისტემის ჰუმანიზაციის პროცესში", — აღნიშნა გახარიამ.

თეა წულუკიანი ერთადერთი მინისტრი იყო ქართული ოცნების ხელისუფლებაში, რომელმაც თანამდებობა ბოლომდე შეინარჩუნა. ის 2020 წლის საპარლამენტო არჩევნებში ქართული ოცნების პროპორციულ სიაში მეოთხეა. წულუკიანმა საარჩევნო კამპანიის გამო მინისტრის პოსტი უკვე დატოვა.

თეა წულუკიანის საქმიანობას უკავშირდება საქართველოს სახელმწიფოს წინააღმდეგ დაწყებული რამდენიმე დავა ადამიანის უფლებათა ევროპულ სასამართლოში, ასევე, უშუალოდ სამინისტროს მიმართ. თეა წულუკიანის მინისტრობას უკავშირდება რუსთავი 2-ის საქმეზე სტრასბურგის სასამართლოს მიერ გამოყენებული დროებითი ზომა, როცა უზენაესი სასამართლოს მიერ მიღებული გადაწყვეტილების აღსრულება შეჩერდა.

ევროსასამართლომ კონვენციის მე-18 მუხლის დარღვევა დაადგინა ვანო მერაბიშვილის საკნიდან გაყვანის შემთხვევაში.

გარდა ამისა, პირველად საქართველოს ისტორიაში ადამიანის უფლებათა ევროპულ სასამართლოში მოსამართლეობის შესარჩევი კონკურსი ორჯერ ჩავარდა და კანდიდატი მხოლოდ მესამე ცდაზე შეარჩიეს. მიზეზი სტრასბურგის მიერ კანდიდატების დაწუნება იყო.

წულუკიანს ყველა ინსტანციის სასამართლოში მოუგეს სამინისტროდან მის მიერ გათავისუფლებულმა თანამშრომლებმა, ანა სუბელიანმა და თამაზ ახობაძემ. უწყებას ორივესთვის განაცდურის ანაზღაურება და ახობაძის სამსახურში აღდგენა დაევალა.