რუსეთის ფედერაციის პრეზიდენტის, ვლადიმერ პუტინის განცხადებით სამხედრო მოქმედებები სომხეთის ტერიტორიაზე არ მიმდინარეობს. რუსულ მედია ვესტისთან ინტერვიუში პუტინმა თქვა, რომ სომხეთი კოლექტიური უსაფრთხოების შეთანხმების ორგანიზაციის წევრია და ამ შეთანხმების საფუძველზე რუსეთს სომხეთის წინაშე კონკრეტული ვალდებულებები აქვს, რასაც მისივე თქმით, რუსეთი ყოველთვის ასრულებდა, ასრულებს და შეასრულებს. პუტინმა, ასევე, განაცხადა, რომ სომხეთის პრემიერმინისტრ ნიკოლ ფაშინიანთან მუდმივ სამუშაო კონტაქტზეა და სამოკაშირეო ვალდებულებების შესრულების კუთხით კითხვის ნიშნები არ დგას.

"კონფლიქტში მონაწილე ყველა მხარეები ჩვენთვის უცხოები არა არიან. რუსეთში, დაახლოებით, 2 მილიონამდე აზერბაიჯანელი და 2 მილიონზე მეტი სომეხი ცხოვრობს. ადამიანები იღუპებიან, ორივე მხარეს დიდი დანაკარგია — ეს უდიდესი ტრაგედიაა. იმედს გამოვთქვამთ, რომ უახლოეს პერიოდში ეს კონფლიქტი ამოიწურება და მხარეებს ცეცხლის დაუყოვნებლივ შეწყვეტისკენ მოვუწოდებთ", — განაცხადა პუტინმა.

სომხეთ-აზერბაიჯანის სამხედრო დაპირისპირება მთიან ყარაბაღში ერთ კვირაზე მეტია გრძელდება. 27 სექტემბრიდან ფართომასშტაბიანი სამხედრო მოქმედებები მთიან ყარაბაღსა და სომხეთ-აზერბაიჯანის საზღვარზე ამ დრომდე მიმდინარეობს. დაღუპულებზე ორივე მხარე ავრცელებს ინფორმაციას.

საერთაშორისო თანამეგობრობა მხარეებს ცეცხლის შეწყვეტისა და მოლაპარაკებების განახლებისკენ უშედეგოდ მოუწოდებს. სხვა ქვეყნებისგან განსხვავებული პოზიცია აქვს თურქეთს, რომელიც მომხდარში მხოლოდ სომხეთს ადანაშაულებს და აზერბაიჯანს მხარდაჭერას უცხადებს. სომხეთსა და მთიან ყარაბაღში ამტკიცებენ, რომ ბრძოლებში ჩართულია თურქული არმიაც, რასაც აზერბაიჯანსა და თურქეთში უარყოფენ.

ამავე თემაზე: