ბათუმში მთავრობის სახლის წინ უმუშევრად დარჩენილი მოქალაქეები შეზღუდვების მოხსნას მოითხოვენ. მოქალაქეები ამჟამადაც აჭარის მთავრობის წინ არიან შეკრებილები და თორნიკე რიჟვაძესთან შეხვედრას მოითხოვენ.

როგორც ისინი ბათუმელებთან ამბობენ, დაწესებული შეზღუდვების გამო მათ სამსახურები დაკარგეს და ბანკის სესხებს ვერ იხდიან. ისინი მოითხოვენ, რომ მთავრობა სესხების გადავადებაში დაეხმაროს.

აქციაზე მომსახურების სფეროს წარმომადგენლები, მათ შორის კაზინოებისა და რესტორნების თანამშრომლები არიან შეკრებილნი. მათივე თქმით, მთავრობის 200-ლარიანი დახმარებაც არაფერში ყოფნით.

"დოლარი რამხელაა და იმასთან პარალელი გაავლეთ 200 ლარის. მეტს მე ვერაფერს ვიტყვი", — ამბობს აქციის ერთ-ერთი მონაწილე.

აქციის კიდევ ერთი მონაწილე ქალი ამბობს, რომ წინასწარ სოციალური დახმარება გამოიტანა და სესხის პროცენტი რამდენიმე წელი უნდა იხადოს.

მთავრობის სახლთან აქციის მონაწილეები რჩებიან და აცხადებენ, რომ აქციას ხვალაც ჩაატარებენ.