39 ადამიანი დაიღუპა ახალ წელს სტამბოლში, ღამის კლუბ რეინაში მომხდარი თავდასხმის შედეგად. მათგან 15 უცხოელია. ინფორმაციას თურქეთის ოფიციალურ პირებზე დაყრდნობით BBC ავრცელებს.

თურქეთის დროით, 01:30 საათზე შეიარაღებულმა პირმა კლუბში მყოფებს ცეცხლი გაუხსნა. თურქეთის შინაგან საქმეთა მინისტრის თქმით, თავდამსხმელი მიმალულია და ის მარტო მოქმედებდა:

"ეს იყო ხოცვა-ჟლეტა, ნამდვილი არაადამიანური სისასტიკე".

თავდასხმას გადარჩენილებიდან ზოგი მძიმედაა დაშავებული. 69 ადამიანი საავადმყოფოშია გადაყვანილი. მათგან 4 უმძიმეს მდგომარეობაშია.

ამ დროისთვის მხოლოდ 21 მსხვერპლია იდენტიფიცირებული. მათგან რამდენიმე კლუბის თანამშრომელია.

თავდაპირველად უცხოურმა მედიებმა გაავრცელეს ინფორმაცია, რომ თავდამსხმელი სანტა-კლაუსის ფორმას ატარებდა, თუმცა ცოტა ხნის წინ გაშიფრული ვიდეო-კადრების მიხედვით, თავდასხმაში ეჭვმიტანილი კლუბის გარეთ მუქი ფერის ტანსაცმლით გადააადგილდება.

თურქეთის ოფიციალური პირები მიიჩნევენ, რომ თავდამსხმელმა კლუბი შესაძლოა სხვა ტანსაცმლით დატოვა.

თავდასხმას უკვე გამოეხმაურა თეთრი სახლი და მას საზარელი ტერორისტული აქტი უწოდა. პაკისტანის პრემიერ-მინისტრმა განაცხადა, რომ ტერორიზმი მსოფლიოს საერთო მტერია და მის დასამარცხებლად ყველა უნდა გაერთიანდეს.

თურქეთის პრეზიდენტმა რეჯეპ ტაიპ ერდოღანმა თავდასხმა ქვეყნის სიმტკიცის დასარღვევად მიმართულ ქმედებად შეაფასა:

"ეს გათვლილია ქვეყანაში მიზანმიმართული ქაოსის გასაჩენად და ჩვენი მოქალაქეების სიმშვიდის დასარღვევად".