მმართველი გუნდის თავმჯდომარის, ბიძინა ივანიშვილის განცხადებით, ქვეყანაში სიღარიბე მისი პარტიის ბრალი არ არის და ეს მემკვიდრეობითია. მისი მტკიცებით, დღევანდელი სიღარიბე ათეული წლების მანძილზე დაგროვებული პრობლემაა და სათავეს იმ დროდან იღებს, როდესაც "ჩვენი ხელით დავანგრიეთ ახლად ფეხადგმული სახელმწიფო".

"დიახ, სიღარიბე ობიექტური რეალობაა და ჩვენ მის არსებობას, რასაკვირველია, ვაღიარებთ, მაგრამ ჩვენ ვერ მივიღებთ ბრალდებას იმის თაობაზე, რომ სიღარიბე, რომელიც მემკვიდრეობით გვერგო, ქართული ოცნების მმართველობის შედეგია", — განაცხადა ივანიშვილმა.

ივანიშვილმა აღნიშნა, რომ არ მიიღებს კრიტიკას წინა ხელისუფლებების ან ოპოზიციებისგან და მათ დაშვებული შეცდომები შეახსენა.

"ამიტომ, უსამართლო კრიტიკას ვერ მივიღებთ ვერც მათგან, ვინც თავის დროზე ქვემეხებით ანგრევდა რუსთაველს და დღეს დანგრეულ ეკონომიკაზე ბედავს ლაპარაკს და ვერც მათგან, ვინც 2012 წლამდე, სხვადასხვა ეტაპზე, საკუთარი უგუნურებითა თუ ანგარებით უზრუნველყო ის ეკონომიკური დაღმასვლა, რამაც შვა მასობრივი სიღარიბე, რომელიც, როგორც უკვე აღვნიშნე, მემკვიდრეობით ერგო ქართული ოცნების ხელისუფლებას.

განსაკუთრებით მიუღებელია კრიტიკა და ბრალდებები იმ ხელისუფლების წარმომადგენლებისგან, ვინც ცხრაწლიანი მმართველობის პერიოდში, მხოლოდ 4 პროცენტით მოახერხა სიღარიბის შემცირება და 2012 წელს, სიღარიბის ზღვარს ქვემოთ მყოფი მილიონ 123 ათასი მოქალაქე დაგვახვედრა", — განაცხადა მან.

გაიგეთ მეტი ივანიშვილის სიტყვით გამოსვლაზე: