საპარლამენტო უმრავლესობის წევრმა ოთარ დანელიამ ნაციონალური მოძრაობის წევრის ზურაბ ჭიაბერაშვილის შეკითხვას უპასუხა დაზარალებულ მევენახეებზე და შეახსენა, რომ ამ საქმესთან დაკავშირებით მან პრემიერის დავალება "ზედმიწევნით" შეასრულა. ამის შესახებ ოთარ დანელიამ დღეს, 28 დეკემბერს პარლამენტის რიგგარეშე სხდომაზე განაცხადა:

"მე ანგარიშვალდებული ვიყავი პრემიერმინისტრთან და შესაბამისად, თქვენგან განსხვავებით, თუ თქვენ თქვენი ბელადის დავალებებს არ ასრულებთ, ჩვენ ჩვენი ხელმძღვანელობის დავალებებს ყოველთვის ზედმიწევნით ვასრულებთ. ამ საკითხთან დაკავშირებით მე მოგახსენებთ, რომ დაწყებული იყო გამოძიება, საქმე ეხებოდა თაღლითობის ფაქტს, მიესაჯათ სასჯელი და არიან მიმალვაში. შესაბამისად, ერთმანეთს შეხვდნენ ღვინის ეროვნული სააგენტოს წარმომადგენლები და დაზარალებულები. მათ შესთავაზეს გამონაკლისის სახით სუბსიდირების წილის ანაზღაურება, რაც მევენახეებისთვის მიუღებელი იყო და ვერ შედგა შეთანხმება".

ჭიაბერაშვილის განცხადებით, საქმე ეხება 46 დაზარალებულ მევენახეს, რომლებმაც 2014 წელს ჩააბარეს ყურძენი და საერთო ღირებულებით 209 000 ლარი მისივე თქმით, დღემდე არ აუღია. ჭიაბერაშვილი აცხადებს, რომ აღნიშნულის მოგვარება პრემიერმა ივლისში დაავალა იმჟამინდელ სოფლის მეურნეობის მინისტრს ოთარ დანელიას.