ევროპული საქართველოს მაჟორიტარი დეპუტატობის კანდიდატი თელავის, ახმეტის, ყვარლისა და ლაგიდეხის ოლქში, ზურაბ ჭიაბერაშვილი, გაუარესებულ ეპიდსიტუაციასთან დაკავშირებით მთავრობას აკრიტიკებს.

მისი თქმით, მთავრობამ კორონაკრიზისის ეფექტიანად მართვის ყველა რესურსი ამოწურა, რადგან მათი გათვლა არ იყო გრძელვადიანი და მხოლოდ მოკლევადიან, არჩევნებამდე პერიოდზე იყო გათვლილი. ჭიაბერაშვილი ამბობს, რომ გახარიას მთავრობას არ აქვს ის კონკრეტული სტრატეგია, რომლითაც მოახერხებს ეფექტურად მართოს კორონაკრიზისი.

"გახარიას მთავრობამ კორონაკრიზისის ეფექტიანად მართვის ყველა რესურსი — ფსიქოლოგიური, ეკონომიკური, პოლიტიკური — გაზაფხულზე ამოწურა. ეს რესურსი ამოიწურა არა იმიტომ, რომ ღარიბი ქვეყანა ვართ, არამედ იმიტომ, რომ გახარიას მთავრობას არც ჰქონია გრძელვადიანი გათვლა. მათი "სტრატეგია" იყო: არჩევნებამდე მივიდეთ და მერე რაც იქნება, იქნება. ამ მიდგომის შედეგია რომ ჯანდაცვის სისტემა ისევ იქაა, სადაც შვიდი თვის წინ ვიყავით. რა თქმა უნდა, ცალკეული საავადმყოფოები მოემზადნენ, რა თქმა უნდა, ექიმები და ექთნები ყველაფერს აკეთებენ, რომ ამ წნეხს გაუძლონ, მაგრამ არ ჩანს ზოგადი სქემა:

— როგორ აპირებს ჯანდაცვის სამინისტრო ინფიცირებულთა მზარდი ნაკადის მართვას და გადანაწილებას;
— რა როლი აქვს პირველად ჯანდაცვას (სეზონური გრიპის ფონზე!);
— აღჭურვილია თუ არა სამედიცინო პერსონალი დაცვის საშუალებებით;
— უზრუნველყოფილია თუ არა ყველა სამედიცინო დაწესებულებაში (სოფლის ამბულატორიიდან დაწყებული მრავალპროფილური საავადმყოფოთი დასრულებული) ინფექციის კონტროლი;
— გაუძლებს თუ არა ამ ყველაფერს სამედიცინო სექტორი. ფინანსურად ჩატარებული ტესტების რაოდენობა, ინფიცირებულთა რიცხვი, სიკვდილიანობის პროცენტი მათემატიკურ სავარჯიშოებად დაგვრჩება, თუ მას თან არ სდევს კრიზისი მართვის გამართული სტრატეგია.

ასეთი სტრატეგია გახარიას მთავრობას არ აქვს", — აცხადებს ზურაბ ჭიაბერაშვილი.