ევროპული საქართველოს საარჩევნო შტაბის ხელმძღვანელის, სერგი კაპანაძის განცხადებით, თუ სააკაშვილი ხელისუფლებაში მარტო თვითონ ვერ დაბრუნდება, მას ბიძინა ივანიშვილის დამარცხება არ აინტერესებს. კაპანაძის თქმით, ყოფილ პრეზიდენტს მხოლოდ ერთპიროვნული მმართველობა უნდა.

"არჩევანი არ არის მიშას და ბიძინას შორის. ეს არის ჩაკეტილი წრე და ბიძინას და მიშას აწყობს მხოლოდ ეს. ორივეს თავისი პირადი ძალაუფლებისთვის უნდა. როგორც არასდროს, ისე დაემგვანენ ერთმანეთს", — განაცხადა კაპანაძემ.

მისივე თქმით, არჩევანი არა ამ ორ ინდივიდს შორის, არამედ წარსულის პოლიტიკასა და გარდამტეხ ცვლილებებს შორისაა. კაპანაძემ აღნიშნა, რომ მნიშვნელოვანია, სააკაშვილი არ გახდეს პრემიერი და არ ჰქონდეს ერთპიროვნული ძალაუფლება.

20 სექტემბერს, მიხეილ სააკაშვილმა TV პირველის ეთერში განაცხადა, რომ ის მხოლოდ საზოგადოების კოალიციას ხედავს და არ ხედავს პარტიულ კოალიციას. მისი თქმით "პოლიტიკური პარტიების და პარტიუკების" საერთოდ არ სჯერა. სააკაშვილმა, ასევე, აღნიშნა, რომ 2020 წლის საპარლამენტო არჩევნებზე უმრავლესობას ან ნაციონალური მოძრაობა აიღებს ან საქართველო "დაიღუპება". ამასთან, ჟურნალისტის კითხვას: "აქვს თუ არა ამომრჩეველს მხოლოდ ორი არჩევანი, თქვენ ან ბიძინა ივანიშვილი?" ყოფილმა პრეზიდენტმა უპასუხა, რომ ასეა და ეს ყველამ კარგად იცის.