ევროპული საქართველოს ლიდერი, დავით ბაქრაძე, ევროპარლამენტარების განცხადებებს ეხმიანება. ბაქრაძის თქმით, ევროპარლამენტარების გამოსვლაში მკაფიოდ ჩანს ტენდენცია, რომ ისინი მხარს უჭერენ საქართველოს და ქართველ ხალხს, თუმცა არიან კრიტიკულები ხელისუფლების მიმართ.

ბაქრაძემ აღნიშნა, რომ ოქტომბრის არჩევნებში აუცილებლად მოხდება გარდამტეხი ცვლილებები და ამისთვის ვითარება მომწიფებულია.

"ევროპარლამენტის დოკუმენტშიც და ევროპარლამენტარების გამოსვლაშიც, მკაფიოდ ჩანდა ტენდენცია, რომ ისინი მხარს უჭერენ საქართველოს და ქართველ ხალხს, თუმცა ისინი არიან ძალიან კრიტიკულები ქართული ოცნების ხელისუფლების მიმართ. ეს არის ის მკაფიო ტენდენცია, რომელიც ჩამოყალიბდა ბოლო პერიოდში ბრიუსელშიც, ვაშინგტონშიც, სტრასბურგშიც და რომელიც მიანიშნებს, რომ ოქტომბრის არჩევნები აუცილებლად უნდა გახდეს გარდამტეხი ცვლილებების არჩევნები.

გარდამტეხი ცვლილებების, რათა საქართველოში გამოსწორდეს ვითარება და აღარ გახდეს საჭირო ყველა ის კრიტიკული შენიშვნა, რომელიც დაფიქსირებულია მათ შორის ევროპარლამენტის დღევანდელ დოკუმენტშიც. ამრიგად, ჩვენი მეგობრების განწყობა არის სრულიად ნათელი, საქართველოს და ქართველ ხალხს აქვს სრული მხარდაჭერა ევროპარლამენტში, ქართული ოცნების მიმართ დამოკიდებულება არის ძალიან კრიტიკული და ეს ნიშნავს იმას, რომ ქვეყნის გარეთაც, ისე როგორც ქვეყნის შიგნით, ვითარება არის მომწიფებული გარდამტეხი ცვლილებების მოტანისთვის", — განაცხადა დავით ბაქრაძემ.