ცესკოს პრესსპიკერის, ანა მიქელაძის განცხადებით, საარჩევნო უბნები დაახლოებით 40 ქვეყანაში გაიხსნება, რომელიც განისაზღვრება იმ დროისთვის კონკრეტულ ქვეყანაში არსებულ ეპიდემიოლოგიურ ვითარებაზე.

"მიუხედავად იმისა, რომ მსოფლიოს მასშტაბით სხვადასხვა ქვეყანაში სხვადასხვა ვითარებაა ახალი კორონავირუსის გავრცელების კუთხით, საგარეო საქმეთა სამინისტროს მიერ ამ დროისთვის მოწოდებული ინფორმაციის საფუძველზე, დაახლოებით 40 ქვეყანაში, იქ, სადაც პრაქტიკა გვქონდა აქამდე, იგეგმება გაიხსნას საარჩევნო უბნები. აღსანიშნავია, რომ უბნების ფუნქციონირება დამოკიდებულია მოცემული დროისთვის კონკრეტულ ქვეყანაში პანდემიის კუთხით არსებულ მდგომარეობაზეც", — განაცხადა მან.

ზოგადად, 2018 წლის საპრეზიდენტო არჩევნებზე 39 ქვეყანაში 55 უბანი გაიხსნა. ცესკო-ს ინფორმაციიღ, მაშინ, საზღვარგარეთ ორგანიზებულ არჩევნებში, პირველ ტურში — 4 801-მა, ხოლო მეორე ტურში —9 028 ამომრჩეველმა მიიღო მონაწილეობა.

2018 წელს საზღვარგარეთ რეგისტრირებული ამომრჩევლების რაოდენობამ პირველი ტურისთვის შეადგინა 57 637, ხოლო მეორე ტურისთვის — 63 739 ამომრჩეველი.

"მას შემდეგ, რაც საუბნო საარჩევნო კომისიები შეიქმნება საზღვარგარეთ, ინფორმაცია
საარჩევნო უბნების შესახებ დაუყოვნებლივ განთავსდება ცესკოს ოფიციალურ
ვებგვერდზე", — აცხადებენ ცესკოში.

უცხოეთში მცხოვრები საქართველოს მოქალაქეები აუცილებელია, იმყოფებოდნენ
საქართველოს საკონსულო აღრიცხვაზე ან უნდა იყვნენ რეგისტრირებულნი საზღვარგარეთ მისამართზე საქართველოს მოქმედი კანონმდებლობის შესაბამისად.

იმ შემთხვევაში, თუ საზღვარგარეთ მყოფი საქართველოს მოქალაქეები არ იმყოფებიან საქართველოს საკონსულო აღრიცხვაზე ან არ აქვთ რეგისტრაცია საზღვარგარეთ, მათ მიმდინარე წლის 10 ოქტომბრის ჩათვლით უნდა გაიარონ რეგისტრაცია საქართველოს შესაბამის დიპლომატიურ წარმომადგენლობაში ან საკონსულო დაწესებულებაში. საკონსულო აღრიცხვაზე დადგომა არ ითვალისწინებს მოსაკრებლის გადასახადს. აღნიშნული პროცედურის განხორციელება ელექტრონულად, საკონსულოს ვებგვერდის საშუალებითაცაა შესაძლებელი.

საქართველოში საპარლამენტო არჩევნები 31 ოქტომბერს შერეული სისტემით გაიმართება.