პარტია მოქალაქეების თავმჯდომარემ, ალეკო ელისაშვილმა განაცხადა, რომ ცენტრალური საარჩევნო კომისია ხელოვნურ ბარიერებს უქმნით და საარჩევნო ნომერს არ ანიჭებთ. ამის შესახებ ელისაშვილმა ბრიფინგზე ისაუბრა.

"ცენტრალური საარჩევნო კომისია, როგორც ქართული ოცნების ყურმოჭრილი დანამატი, არ გვანიჭებს დროულად საარჩევნო ნომერს და ამ ყველაფერს აკეთებს იმისთვის, რომ ხელი შეგვიშალოს სრულფასოვანი და ნორმალური საარჩევნო კამპანიის წარმართვაში", — განაცხადა ელისაშვილმა.

მისი თქმით, რიგითი ნომრის მინიჭების თაობაზე პარტიამ ცესკოში განცხადება ერთი თვის წინ შეიტანა, ცესკომ კი ათი დღის გამავლობაში განცხადებაზეც არ გასცა პასუხი.

"ცესკო ფეხს ითრევს ერთი თვის განმავლობაში, როცა შეეძლო ჩვენი განცხადების შეტანიდან მეორე დღესვე, 12 აგვისტოს ჩაეტარებინა წილისყრა და მოენიჭებინა საარჩევნო ნომერი. ეს არის წვრილმანი ვირეშმაკობა ჩვენთვის ხელის შესაშლელად, რომ ვერ ჩავატაროთ სრულფასოვანი საარჩევნო კამპანია", — აღნიშნა ალეკო ელისაშვილმა.

პარტია მოქალაქეების თავმჯდომარის თქმით, ისინი ცესკოსგან დაუყოვნებლივ მოქმედებას და საარჩევნო ნომრის მინიჭებას ითხოვენ.