დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განმარტა, ინფიცირებულთა რიცხვის ზრდის მიუხედავად, რატომ არ იკეტება აჭარის რეგიონი ახლა, როცა თავის დროზე რეგიონები უფრო ნაკლები შემთხვევების დაფიქსირების დროს ჩაიკეტა. ამის შესახებ გამყრელიძემ TV პირველის ეთერში ისაუბრა.

მისი თქმით, ამის მიზეზი ისაა, რომ პანდემიის დასაწყისში ინფექციის შესაკავებლად ბევრად მკაცრი მეთოდების გატარება იყო საჭირო, ბოლო შვიდი თვის მანძილზე კი მათ ბევრი რამ ისწავლეს.

"გავაფართოვეთ კონტაქტების სერიოზულად კვლევა, გავაფართოვეთ PCR ტესტირება. თუ მარტში ჩვენ დღეში ვაკეთებდით 100-150 კვლევას, დღეს ვაკეთებთ 7 000-მდე კვლევას. ამას ემატება კიდევ, 1 500-მდე სწრაფი ტესტებით კვლევა. ანუ, ვცდილობთ, არცერთი ინფიცირებული არ გაგვეპაროს და მაქსიმალურად ადრეულ ეტაპზე მოვახდინოთ იდენტიფიცირება", — აღნიშნა გამყრელიძემ.

8 სექტემბრის მონაცემებით, საქართველოში კორონავირუსის 45 ახალი შემთხვევა გამოვლინდა, 6 ადამიანი გამოჯანმრთელდა. ინფექციური საავადმყოფოს სამედიცინო დირექტორის, მარინა ეზუგბაიას თქმით, 45 ახალი შემთხვევიდან 23 აჭარაში გამოვლინდა.