ევროპული საქართველოს ქუთაისის მაჟორიტარობის კანდიდატი, ოთარ კახიძე მიხეილ სააკაშვილის შესაძლო ჩამოსვლასა და იმ ცვლილებებზე საუბრობს, რომელიც ქვეყანას სჭირდება.

ოთარ კახიძის თქმით, ქვეყანას სჭირდება რეალური ცვლილებები და არა მიხეილ სააკაშვილის ჩამოსვლა. კახიძემ აღნიშნა, რომ იმ ჭაობიდან ამოყვანას, რომელშიც ქვეყანა ბიძინა ივანიშვილმა ჩააგდო, სჭირდება კონკრეტული გეგმა, ხოლო სწორედ ევროპული საქართველო იქნება კომპასი, რომელიც აჩვენებს სწორ გზას გარდამტეხი ცვლილებებისაკენ.

"ქვეყანას სჭირდება არა მიხეილ სააკაშვილის დაბრუნება, არამედ ცვლილებები. ქვეყანას სჭირდება იმ კრიზისიდან გამოყვანა, რომელშიც ივანიშვილმა ჩააგდო, იმ ჭაობიდან ამოყვანა, რომელიც მოიტანა ქართულმა ოცნებამ.მიხეილ სააკაშვილი ბევრჯერ დაპირდა ქვეყანას ჩამოსვლას, თუმცა მიხეილ სააკაშვილი ჩამოვა მაშინ, როდესაც ქართული ოცნება შეიცვლება, ამიტომ ის ელოდება ივანიშვილის დამარცხებას", — განაცხადა კახიძემ

მისი თქმით ევროპულ საქართველოს აქვს რეალური გეგმა სიტუაციის ცვლილებისთვის და არა ბიუჯეტს აცდენილი დაპირებები.

"მიხეილ სააკაშვილმა გააკეთა განცხადება რომ მას კოალიცია სჭირდება არა პარტიებთან, არამედ ხალხთან. როგორც ჩანს, ამ ხალხში ის კახა ოქრიაშვილებს და ოცნებიდან გადმობირებულ დეპუტატებს გულისხმობს. ჩვენ საკითხს ასე არ ვუყურებთ. ჩვენ გვაქვს რეალური გეგმა, არა სადღეგრძელოები, არა ბიუჯეტს აცდენილი დაპირებები, არამედ კონკრეტული გეგმა გადასახადების შემცირებით, ინვესტიციების მოზიდვით, როგორ შეიცვლება სიტუაცია ქვეყანაში, ქუთაისთან მიმართებაში ჩვენ გვაქვს შემდეგი გეგმა: უნდა აღდგეს საჰაერო სივრცე, უნდა აღდგეს ვიზეარის დახურული ბაზა, რომელიც ივანიშვილის მავნებლობის შედეგად დაიხურა, უნდა შემოვიდეს რაინეარი ქუთაისის საჰაერო სივრცეში და ეს ქუთაისის ტურისტულ პოტენციალს გაზრდის ნახტომისებურად და ჩვენ დავდებთ მილიონზე მეტ ევროპელ ტურისტს ქუთაისისთვის. ამავე დროს, ქუთაისის აეროპორტს უნდა დაემატოს სატვირთო ტერმინალი, რათა იმერეთის მხარის საექსპორტო პოტენციალი გაიზარდოს. ქალაქი არის კორუფციისა და ნეპოტიზმის ჭაობში, მოუწესრიგებელია საზოგადოებრივი ტრანსპორტი, გზები და ეს არის ის ცვლილებები, რომლებიც გვჭირდება", — განაცხადა ოთარ კახიძემ.