დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

დაავადებათა კონტროლის ეროვნული ცენტრის დირექტორმა, ამირან გამყრელიძემ, ბათუმში მდებარე ბარებისა და კლუბების თანამშრომლებს მოუწოდა, ხშირად გაატარონ ეპიდსაწინააღმდეგო ღონისძიებები და ჩაიტარონ ტესტირება.

"არ დასმულა საკითხი მათ დაკეტვაზე, თუმცა იქ უნდა იყოს დაცული ყველა ეპიდსაწინააღმდეგო წესი, კერძოდ, ყოველდღიური კარგი დალაგება მსუბუქი დეზინფექციით და 2-3 დღეში ერთხელ სრული დეზინფექცია. ამავე დროს, არ იყო დამყოლობა, როცა ჩვენ მოვუწოდეთ იქ არსებულ კაფეებს და ბარებს, რომ ტესტირება ჩაეტარებინათ. დღეს, კიდევ ერთხელ მოვუწოდებ, აუცილებელია გაიარონ ტესტირება, ამისთვის ბათუმში ყველა პირობაა შექმნილი", — განაცხადა გამყრელიძემ საკოორდინაციო საბჭოს სხდომის შემდეგ.

2 სექტემბრის მონაცემებით, საქართველოში კორონავირუსის 38 ახალი შემთხვევა გამოვლინდა, მათ შორის 22 ბათუმში მდებარე საკონდიტრო დონას უკავშირდება.

ჯამში, საქართველოში კორონავირუსის დადასტურებულ შემთხვევათა რაოდენობა 1 548-მდე გაიზარდა, გამოჯანმრთელებულია 1 270 ადამიანი, გარდაცვლილი კი — 19. კარანტინის რეჟიმში რჩება 6 059 პირი, სტაციონარში მეთვალყურეობის ქვეშ კი 239 პაციენტია.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: