იუსტიციის მინისტრის, თეა წულუკიანის თქმით, სუროგაციის ინსტიტუტი ყოველგვარი რეგულაციების გარეშე ნაციონალური მოძრაობის "შემოტანილია" და ახალი პირობები უზრუნველყოფს იმას, რომ ჩვილებით ვაჭრობა შეუძლებელი გახდება.

"2012 წლის გაზაფხულზე ნაციონალურმა მოძრაობამ ამ ქვეყანაში შემოიტანა სუროგაციის ინსტიტუტი. მაშინ, იმ პერიოდიდანვე, არ იყო დაშვებული ერთი ადამიანის მიერ სუროგაციის პროცესი მარტოხელა მშობლის მიერ. დღეს აღშფოთება იმასთან დაკავშირებით, რომ ენმ-მ სუროგაცია რომ შემოიტანა საქართველოში, მარტოხელა მშობელს არ მისცა სუროგაციის უფლება, ვფიქრობ, არის დაგვიანებული. ჩვენ 8 წლის მანძილზე ნაციონალური მოძრაობის შემოტანილ აბსოლუტურად რეგულაციების გარეშე სუროგაციას, რომელიც ტრეფიკინგის ღია წყარო იყო, შევუქმენით გარკვეული პირობები იმისთვის, რომ ჩვილებით ვაჭრობა საქართველოში იყოს შეუძლებელი", — განაცხადა წულუკიანმა.

27 აგვისტოს თეა წულუკიანმა ხელი მოაწერა ბრძანებას, რომლის მიხედვითაც ექსტრაკორპორული გზით დაბადებული ბავშვის აღზრდა მხოლოდ ქალსა და კაცს შეუძლიათ, იმ შემთხვევაში, თუ ქორწინებიდან გასულია, 1 წელი ან იმყოფებიან ფაქტობრივ თანაცხოვრებაში ამავე პერიოდის განმავლობაში.