საქართველოს პრეზიდენტმა, სალომე ზურაბიშვილმა და სახალხო დამცველმა, ნინო ლომჯარიამ ბავშვთა უფლებების დაცვის, ოჯახში ძალადობისა და ქალთა მიმართ ძალადობის საკითხებზე ისაუბრეს. შეხვედრაზე ცნობილი გახდა, რომ პრეზიდენტი ბავშვთა უფლებების პოპულარიზაციის საინფორმაციო კამპანიაში ჩაერთვება.

პრეზიდენტის ადმინისტრაციის ცნობით, ზურაბიშვილი მიესალმება, როგორც ახალ ბავშვთა კოდექსს ასევე, იმ ინიციატივას, რომელიც შემაკავებელ ორდერთან ერთად, მოძალადის მიმართ ელექტრონული ზედამხედველობის დაწესებას ითვალისწინებს.

"სახელმწიფო მექანიზმები იხვეწება და მკაცრდება, რათა ჩვენი კულტურისთვის სრულიად მიუღებელი ფენომენი — ძალადობა აღმოიფხვრას, მაგრამ ნუ დავივიწყებთ, რომ საზოგადოების და თითოეული ჩვენგანის პასუხისმგებლობაც არის ძალადობის მიუღებლობა და დროული რეაგირება, — აღნიშნა პრეზიდენტმა.

პრეზიდენტი მიიჩნევს, რომ ახალ "ბავშვთა კოდექსში" ბავშვთა უფლებების დაცვის მექანიზმები საკმაოდ კარგადაა გაწერილი, თუმცა მისი განხორციელებისას პრობლემები ჯერ კიდევ არსებობს.

შეხვედრისას ბავშვთა უფლებების დაცვის საკითხში სხვადასხვა ორგანიზაციის ჩართულობის მნიშვნელობაზე ისაუბრეს. პრეზიდენტი და სახალხო დამცველი შეთანხმდნენ, რომ აღნიშნულ საკითხებთან დაკავშირებით ერთობლივ მუშაობას გააგრძელებენ.