ხელისუფლების მოწინააღმდეგე ერთ–ერთმა სამხედრო დაჯგუფებამ, სირიაში, პროსახელისუფლებო მოსახლეობის ევაკუაციისთვის განკუთვნილი 5 ავტობუსი დაწვა. ამის შესახებ ინფორმაციას BBC ავრცელებს.

ბრიტანული ტელეარხის ცნობთ, 5 ავტობუსი მიემართებოდა იდლიბის პროვინციაში მდებარე ორი შიიტური სოფლისკენ, რომელიც ამბოხებულებს ალყაში აქვთ მოქცეული. იდლიბის პროვინცია ამ დრომდე ამბოხებულთა კონტროლის ქვეშაა.

როგორც ასადის ხელისუფლების წარმომადგენლები აცხადებდნენ, სწორედ ამ ორი სოფლიდან მოსახლეობის ევაკუაციის შემდეგ დაიწყებოდა ალეპოს აღმოსავლეთ რაიონში ჩარჩენილი 20 ათასზე მეტი ადამიანის ევაკუაცია.

უკვე რამდენიმე კვირაა, მშვიდობიანი მოქალაქეები გაუსაძლის პირობებში იმყოფებიან როგორც ამბოხებულების, ისე პრო–სახელისუფლებო ძალების მიერ ალყაშემორტყმულ დასახლებებში, თუმცა, მათი ევაკუაცია ამ დრომდე ვერ ხერხდება.

სირიაში უკვე 5 წელია სისხლისმღვრელი ომი მიმდინარეობს. ასადის რეჟიმს ამბოხებულთა წინააღმდეგ ბრძოლაში ეხმარება რუსეთი და ირანი. სირიაში ერთმანეთს დაუპირისპირდა ქვეყნის შიიტი და სუნიტი მოსახლეობა, ასევე, ქურთები. ქვეყნის მნიშვნელოვანი ნაწილი დაიკავეს ტერორისტებმაც. უფრო დეტალურად სირიაში მიმდინარე მოვლენებზე, შეგიძლიათ წაიკითხოთ On.ge-ს სტატია.