საქართველოს მოქალაქე, თორნიკე კუბლაშვილი ითხოვს დისკრიმინაციულად ცნონ კარანტინში მოთავსების წესი, რომელიც საზღვრის კვეთის შემთხვევაში კარანტინს მხოლოდ საქართველოს მოქალაქეს ავალდებულებს.

მის ინტერესებს სასამართლოში საქართველოს ახალგაზრდა იურისტთა ასოციაცია იცავს. ადვოკატი, ლაშა ბექიშვილი On.ge-სთან განმარტავს, რომ დავა მიმდინარეობს მოქალაქეობის ნიშნით დისკრიმინაციაზე და იმ შემთხვევაში, თუ სასამართლო სარჩელს დააკმაყოფილებს, საქართველოს ყველა მოქალაქე შეძლებს ქვეყანაში კარანტინის გარეშე შემოსვლას.

"ამ ეტაპზე გასაჩივრებული გვაქვს მთავრობის დადგენილებები, რომლის მიხედვითაც, რამდენიმე ქვეყნის მოქალაქე, მაგალითად გერმანიის მოქალაქეები და გერმანიაში მუდმივად მცხოვრები პირები საქართველოში შემოსვლისას არ ექვემდებარებიან იზოლაციას ან კარანტინს, ხოლო საქართველოს მოქალაქე, ნებისმიერ შემთხვევაში, თუნდაც, წლების განმავლობაში ცხოვრობდნენ გერმანიაში, თუნდაც არ უფიქსირდებოდეს მოგზაურობის ისტორია, საქართველოში შემოსვლისას ავტომატურად ხვდება კარანტინში. ჩვენ სწორედ ეს რეგულაცია გვაქვს გასაჩივრებული და ვითხოვთ, რომ მსგავსად გერმანიის მოქალაქეებისა, საქართველოს მოქალაქეებს, ქვეყანაში შემოსვლისას, არ მოუწიოთ იზოლაციაში და კარანტინში გადაყვანა", — ამბობს ბექიშვილი.

ის აღნიშნავს, რომ თუ საქართველოში შემოდის გერმანიის მოქალაქე, მას საზღვარზე უტარდება თერმოსკრინინგი და 37º-ზე მეტი ტემპერატურის შემთხვევაში, უტარდება PCR ტესტი. შესაბამისი პროცედურები მის მიმართ მხოლოდ მას შემდეგ იწყება, როცა Covid-19 დაუდასრურდება. საქართველოს მოქალაქეებს კი პირდაპირ კარანტინში უშვებენ.

On.ge მოსარჩელე თორნიკე კუბლაშვილსაც დაუკავშირდა. ის აცხადებს, რომ საქართველოში ჩამოსვლა პირადი მიზეზების გამო სურს, თუმცა კარანტინის ხანგრძლივობიდან გამომდინარე ამას ვერ ახერხებს.

"მინდა საქართველოში ჩამოსვლა უკვე 2 თვეა, პირადი მიზეზებით. თუმცა იმის გამო, რომ კარანტინში უნდა წავიდე 14 დღე, ვერ მოვდივარ. ვმუშაობ აქ, როგორც არქიტექტორი და რეალურად, იმდენ დროს ვერ ავიღებ შვებულების სახით, რომ აზრი ჰქონდეს ჩამოსვლას. თუკი 14 დღე კარანტინში ვიქნები, 20 დღიდან მხოლოდ 4 დღე მექნება საქმეების მოსაგვარებლად", — განაცხადა კუბლაშვილმა On.ge-სთან საუბრისას.