პოლიტიკური გაერთიანების, ლელო საქართველოსთვის, თავმჯდომარემ, მამუკა ხაზარაძემ ეგრეთ წოდებული საზღვრის პირას მდებარე 70 სოფლის ეკონომიკურ განვითარებაზე ისაუბრა.
მისი თქმით, ლელო სერიოზულ ცვლილებებს განახორციელებს იმისთვის, რათა ეს სოფლები მატერიალურად და ტექნიკურად აღჭურვილი იყოს აღჭურვილი და მოსახლეობამ იგრძნოს, რომ მათ უკან სახელმწიფო დგას.

"დღევანდელი დღე ძალიან მძიმეა ჩვენი ქვეყნისთვის. 12 წლის წინ მართლა დიდი ტრაგედია მოხდა. ეგრეთ წოდებული საზღვრის პირას მდებარე 70 სოფელი დღეს არის ეკონომიკურად რთულ მდგომარეობაში. მინდა, გაგაცნოთ ლელოს პოზიცია ამ სოფლებთან დაკავშირებით, სადაც ჩვენ შევიტანთ ძალიან სერიოზულ ცვლილებას და ეს 70 სოფელი იქნება მატერიალურად, ტექნიკურად აღჭურვილი, რათა მოსახლეობამ იგრძნოს, რომ მათ უკან დგას სახელმწიფო. ამისთვის ჩვენ გვაქვს საკმაოდ სერიოზული პაკეტი, რომ ბრძოლის წინა ხაზზე მყოფი თითოეული ადამიანი, იქნება ეს ახალგაზრდა თუ მოხუცი, ფინანსურ, მატერიალურ და ტექნიკურ მხარდაჭერას გრძნობდეს სახელმწიფოს მხრიდან. იქ ცხოვრება დღეს არის გმირობის ტოლფასი. ჩვენ არცერთ გოჯ მიწას არ დავთმობთ. ეს იქნება პირველი ნაბიჯი და [იმის] ჩვენება, რომ ნებისმიერ გოჯ მიწაზე, რომელსაც შეეხება ჩვენი ოკუპანტი, გვექნება საკმაოდ სერიოზული რეაგირება — იქნება ეს დიპლომატიური ფორმით, პროტესტით თუ ნებისმიერი სხვა ფორმით", — განაცხადა მამუკა ხაზარაძემ.