გარდაცვლილი თამარ ბაჩალიაშვილის ოჯახის ადვოკატის, მიხეილ რამიშვილის განცხადებით, შსს-ს გამოძიება თვითმკვლელობის მიმართულებით მიჰყავს, ოჯახი კი ამის "პირდაპირი წინააღმდეგია". მისი თქმით, ფრაზები, გარდაცვლილს "ფსიქოლოგი ჰყავდა" ან "წერილები ჰქონდა" მიუთითებს იმას, რომ შინაგან საქმეთა სამინისტროს პირდაპირი მიმართულება აქვს აღებული.

"მე მინდა ხაზი გავუსვა, თვითმკვლელობა არ ხდება ესე დამოუკიდებლად. არსებობს მკვლელობა, როცა ერთი ადამიანი თვითმკვლელობას ახორციელებს ფსიქოლოგიური ზეწოლით [...]

გავარკვევ მე დეტალურად ფსიქოლოგის ჩვენების თანახმად რა პრობლემები ჰქონდა, პოლიციის მხრიდან რამდენად კვალიფიციურად ხდებოდა დათვალიერება [...] ეს ყველაფერი გადაფარვის მცდელობაა. გადაფარვა ხდება რაღაც მიზნების გადასაფარად. პირობას ვიძლევი, ყველაფერს თავისი სათქმელი დაერქმევა", — განაცხადა რამიშვილმა TV პირველის ეთერში.

დღეს, შინაგან საქმეთა სამინისტროში თამარ ბაჩალიაშვილის საქმეზე საგანგებო ბრიფინგი გაიმართა. ბრიფინგზე კრიმინალური პოლიციის დეპარტამენტის დირექტორმა განაცხადა, რომ პირველადი დათვალიერებით გარდაცვლილი თამარ ბაჩალიაშვილის სხეულზე ძალადობის კვალი არ აღინიშნება.

თამარ ბაჩალიაშვილის საქმე

23 წლის თამარ ბაჩალიაშვილი 18 ივლისს დაიკარგა. ოჯახის წევრების განცხადებით, ის საკუთარი მანქანით ქვემო ფონიჭალიდან გავიდა და აღარ დაბრუნებულა. მათი თქმით, დაკარგულის ავტომობილი ჯერ მარნეულში, ბოლოს კი თეთრიწყაროს მუნიციპალიტეტის სოფელ ხაიშში დააფიქსირეს. საქმეზე გამოძიება თავისუფლების უკანონო აღკვეთის მუხლით მიმდინარეობდა.

დაკარგვიდან 5 დღის შემდეგ, ბაჩალიაშვილი საკუთარ მანქანაში გარდაცვლილი იპოვეს. მანქანა თეთრიწყაროს მუნიციპალიტეტში, მაგისტრალიდან 100-200-მდე მეტრის დაშორებით, ბუჩქნარში იყო გაჩერებული. ოჯახის ადვოკატის, მიხეილ რამიშვილის თქმით, ცხედარი უკანა სავარძელზე იყო და ქალი რამდენიმე დღის გარდაცვლილია.

ოჯახი გამოძიებას უნდობლობას უცხადებს და საქმეში დამოუკიდებელი ექსპერტი ჩაერთო. მათთვის გაურკვეველია, როგორ ვერ იპოვეს მანქანა 4 დღის განმავლობაში, თუკი სამძებრო სამუშაოებში ჩართული იყო დრონი. ადვოკატს, ასევე, აქვს კითხვა, რატომ იპოვა მანქანა მწყემსმა და ვერ მოახერხა ეს პოლიციამ.

ადვოკატის ინფორმაციით, გარდაცვლილის მანქანაში იპოვეს მისი ტელეფონი, რომელიც გამორთული იყო და ამოღებულია სხვადასხვა მედიკამენტიც. რამიშვილს არ აქვს ინფორმაცია, კონკრეტულად რა პრეპარატებია, თუმცა აცხადებს, რომ ფსიქოტროპული არ არის.

სოციალურ ქსელებში და მედიაში გაჩნდა კითხვები ბაჩალიაშვილის სამსახურთან დაკავშირებით. ბაჩალიაშვილს LinkedIn-ის თანახმად, დეველოპერად ორ კომპანიაში, ზეგ-სა და ავსტრიულ Spryflash-ში მუშაობდა. კომპანია ზეგში დღეს შსს შევიდა. დირექტორი ამტკიცებს, რომ ბაჩალიაშვილის გარდაცვალება ზეგ-ში საქმიანობას არ უკავშირდება.