აგვისტოს დასაწყისიდან Air France პარიზი-თბილისის მიმართულებით კვირაში 2 რეისს შეასრულებს. ამის შესახებ ეკონომიკის მინისტრმა. ნათია თურნავამ განაცხადა.

"შემდეგი ნაბიჯი იყო გადასადგმელი Air France-სთან და დღეს ჩვენ მივიღეთ საბოლოო გადაწყვეტილება და დავუდასტურებთ Air France-ს აგვისტოს დასაწყისიდან, ზუსტ თარიღს თვითონ კომპანია განსაზღვრავს, მათ შეეძლებათ კვირაში ორი ფრენა. მათ შეეძლებათ დაიწყონ პარიზის შარლ დე გოლის აეროპორტსა და თბილისის საერთაშორისო აეროპორტს შორის პირდაპირი რეგულარული მიმოსვლა", — განაცხადა თურნავამ.

მისივე თქმით, თბილისი-რიგას მიმართულებით Air Baltic-თან მოლაპარეკებები გრძელდება და ალბათ, გარკვეული გადაწყვეტილება აქაც მალე იქნება მიღებული.

როგორც თურნავამ აღნიშნა, ასევე, Airzena კომერციულ ჩარტერებს გააგრძელებს და დაახლოებით, 16 ფრენა ექნება. მისი თქმით, ეს ძირითადად ვენისა და ამსტერდამის მიმართულებები იქნება.

"სხვა კომერციული ჩარტერებიც ჩვენთან შეთანხმებით, საკარანტინე სივრცეების უზრუნველყოფით პერიოდულად იქნება დაშვებული", — განაცხადა თურნავამ.

როგორც თურნავა ამბობს, გერმანიასთან Lufthansa-ს მეშვეობით უკვე მოლაპარაკება შედგა და პრაქტიკულად, მან თავისი ფრენების განრიგი უკვე გამოაქვეყნა და ბილეთებიც გაყიდვაშია.

მისივე თქმით, ყველა სხვა მიმართულებით რეგულარული ფრენების დროებით აკრძალვას აგვისტოში კვლავ გაახანგრძლივებენ, თუმცა ეტაპობრივად რეგულარული ფრენების არეალს გაზრდიან.