რუსეთის ცესკოს მონაცემებით, საკონსტიტუციო ცვლილებებს მოსახლეობის 77,92 პროცენტი უჭერს მხარს. ეს კი იმას ნიშნავს, რომ ვლადიმერ პუტინი რუსეთის პრეზიდენტობას 2036 წლამდე შეძლებს.

ცესკოში აცხადებენ, რომ ხმების 99,97 პროცენტი უკვე დათვალეს და ცვლილებებს მხოლოდ 21,27 პროცენტი არ უჭერს მხარს. მოქალაქეების აქტივობამ კი 64,99 პროცენტი შეადგინა.

საკონსტიტუციო ცვლილებების კენჭისყრა 25 ივნისს დაიწყო და 1-ლ ივლისს დასრულდება. ამ ხნის განმავლობაში საუბრობდნენ იმაზე, რომ ადგილობრივი ხელისუფლების წარმომადგენლები ამომრჩეველს ხმის მისაცემად ლატარეის ბილეთებითა და ფულადი პრიზებით იზიდავდა.

რუსეთის კონსტიტუციაში ცვლილებები რუსეთის პრეზიდენტის ვლადიმერ პუტინის ინიციატივით შედის. ერთ-ერთ ცვლილებად განიხილება პუტინისთვის საპრეზიდენტო ვადის განულება, რის შემთხვევაშიც მეორე ვადის დასრულების შემდეგ, 2024 წელს იგი საპრეზიდენტო არჩევნებში მონაწილეობა ისევ შეეძლება.

საკონსტიტუციო ცვლილებები მიიღო რუსეთის პარლამენტმა და რეგიონულმა საკანონმდებლო ორგანოებმაც დაუჭირეს მხარი. მის კონსტიტუციურობაში ეჭვი არ შეჰპარვია რუსეთის საკონსტიტუციო სასამართლოსაც. ამის შემდეგ კი ცვლილებები საყოველთაო კენჭისყრაზე გავიდა.