ალეკო ელისაშვილმა ტელეკომპანია მთავარის ეთერში სექსისტური ფრაზა გამოიყენა. მან ევროპული საქართველოს წევრების მისამართით თქვა, რომ "ორღობის დედაკაცივით ჭორაობენ".

საუბარი ეხებოდა ოპოზიციაში არსებულ აზრთა სხვადასხვაობას თბილისში საერთო მაჟორიტარების თემაზე. ელისაშვილმა თქვა, რომ მას მოლაპარაკებებში ჩართვა დავით ბაქრაძემ სთხოვა.

"სად გაიზარდნენ, სად ისწავლეს ამ უგულავამ და ბოკერიამ ასეთი ქცევა. ერთი კვირა მეხვეწებოდა შევხვდეთო დათო ბაქრაძე. გიგა ბოკერიას რომ მოეწერა, არც შევხვდებოდი. ერთი კვირა ვითრევდი ფეხს და შევხვდი, ვილაპარაკეთ. ამის შემდეგ კიდევ მომწერა და ვუთხარი, არაფერი სალაპარაკო არ მაქვს-მეთქი. ამის მერე დგანან და ასეთ შეხვედრაზე, რომელზეც მეხვეწები, მთხოვ, რომ შევხვდეთ, ერთი კვირა მწერ, მერე გამოდიხარ და ორღობის დედაკაცივით ჭორაობ. ეს სად ისწავლეს, როგორ მაინტერესებს, ასეთი რაღაც როგორ უნდა იკადრო, მერე მე მაბრალებენ, გვევაჭრებოდაო. გიგა ბოკერია სტამბოლის მონათა ბაზრის დირექტორია, მაჟორიტარების პრეზიდენტია, ქურდია და ის ანაწილებს ამ მაჟორიტარებს... უბრალოდ წარმოდგინეთ სცენა, სადაც მე მივდივარ თავდახრილი და გიგა ბოკერიას ვეხვეწები, იქნებ ორი ადგილი დამითმო, თქვენო აღმატებულებავ. ვინ ოხერი... ვინ ტიკი ტომარაა, რატომ ჰგონია, ვიღაცას რაღაცა უნდა დაუთმოს", — თქვა ელისაშვილმა.

ჟურნალისტის კითხვას, რის მიხედვით სურდა ორ ოლქში მაჟორიტარის დასახელება თავისი პარტიიდან, ელისაშვილი პასუხობს, რომ რესურსიდან გამომდინარე.

"რვავეს ვიტყოდი, რომ გვცოდნოდა, რომ რვას მოვიგებდით", — დასძინა მან.

მისივე თქმით, პოლიტიკაზე გული ერევა და აპირებს ეს ყველაფერი "ამოაყირავოს".

"ცხვირს ნუ მიზომავენ და სამგლე გოჭებივით ნუ არიან ატეხილები ბოკერია და მისი რაზმი და მისი მექრთამე ძმაკაცები. პოლიტიკას შორიდან ვუყურებდი და გული მერეოდა, პროცესში რომ შევედი, კიდევ უფრო გული მერევა. ხალხის გარეშე, სადღაც კულისებში რომ რაღაცებს ფუთფუთებენ და თანხმდებიან, გამოდიან და ამბობენ — ეს აქ იქნება, ეს იქ იქნება", — თქვა მან.