"იმის თქმასაც კი ბედავენ, რომ აღარ ახსოვთ რა მოხდა 20 ივნისს და ჩვენი თვალები არის მეორეხარისხოვანი და პირველი ხარისხოვანი იყო ის, რომ მათ შტურმი აარიდეს პარლამენტს", — ასე გამოეხმაურა 20 ივნისს აქციის დაშლისას დაშავებული, მაკო გომური პრემიერმინისტრ გიორგი გახარიას. გომურმა ამის შესახებ, დღეს 20 ივნისის წლისთავთან დაკავშირებით გამართულ აქციაზე განაცხადა.

მისი თქმით, 20 ივნისიდან 1 წლის შემდეგაც ვერ იპოვა კითხვაზე პასუხი, რატომ ესროლეს.

"ზუსტად ერთი წელი გავიდა 20 ივნისიდან და როგორც 1 წლის უკან ასე ვიდექი ზუსტად, იგივე ტანსაცმელი მეცვა და როგორც ახლა ვქმნი რაიმე საფრთხეს თქვენთვის, სამართალდამცავებისთვის და ან იმ შენობისთვის, მაშინაც ზუსტად ასეთ საფრთხეს წარმოვადგენდი. როგორც ჩანს, ეს არ იყო საკმარისი ერთ-ერთი სამართალდამცავისთვის და მესროლა. მესროლა და გაჩნდა შეკითხვა — რატომ? ეს ის შეკითხვაა, რომელზეც ერთი წლის განმავლობაში პასუხი ვერ მივიღე. არადა, რეალობა მარტივია, უნდა მივიღო საკუთარი წილი სამართალი. თუმცა სხვა რეალობაც გვაქვს ჩვენს წინ, პარლამენტში, რომლებიც ცდილობენ რომ თავიანთი ტრიუკებით ჩვენი სახელი გააფუჭონ საზოგადოებაში. იმის თქმასაც კი ბედავენ, რომ აღარ ახსოვთ რა მოხდა 20 ივნისს და ჩვენი თვალები არის მეორეხარისხოვანი და პირველი ხარისხოვანი იყო ის, რომ მათ შტურმი აარიდეს პარლამენტს. კითხვა მიჩნდება,ჩემი თვალის ამოთხრით რომელი შტურმი აარიდეთ პარლამენტს, რას უშლიდათ იქ ჩვენი დგომა, ჩვენი მშვიდობიანი პროტესტი", — განაცხადა მაკო გომურმა.

20 ივნისის მოვლენებზე საუბრისას გიორგი გახარიამ თქვა, რომ ზუსტად არ ახსოვს ქციის დაშლასთან დაკავშირებით საგამოძიებო უწყებაში რამდენჯერ იყო დაბარებული. რაც შეეხება კითხვას, რამდენი სამართალდამცავია ბრალდებულად ცნობილი 20 ივნისის აქციის საქმეზე, მისი თქმით, ის უკვე 8 თვეა შს მინისტრი აღარაა და მეხსიერებიდან რაღაცები წაეშალა.

"სამწუხაროდ, უკვე 8 თვე გავიდა, რაც შინაგან საქმეთა მინისტრი აღარ ვარ და რაღაცები მეხსიერებაში იშლება. 20 ივნისთან დაკავშირებით, უამრავი სხვადასხვა კითხვა იქნება, ვინ გასცა ბრძანება, ისროდნენ თუ არა დამიზნებით, არ ისროდნენ, ეს ყველაფერი არის მეორეხარისხოვანი, აი, ასე, ჩემთვის არის მეორე ხარისხოვანი. ჩემთვის მთავარი არის ის, რომ 20 ივნისს ერთი წელი გავა, ორი თუ ბევრი წელი გავა ამის შემდგომ, ეს იყო ქმედება, რომლითაც შს სამინისტრომ და საქართველოს სამართალდამცავმა სისტემამ ქვეყანას აარიდა დიდი დესტაბილიზაცია და არეულობა", — განაცხადა მან.

20 ივნისის მოვლენებიდან 1 წელი გავიდა. ყველაფერი იმით დაიწყო, რომ დილით საზოგადოებამ პირდაპირ ეთერში საქართველოს პარლამენტის თავმჯდომარის სკამში ოკუპანტი ქვეყნის კომუნისტი დეპუტატი იხილა. სწორედ აქედან დაიწყო მშვიდობიანი პროტესტი, რასაც მართლმადიდებლობის საპარლამენტთაშორისო ასამბლეის ჩაშლა მოჰყვა, გავრილოვს კი ქვეყნის დატოვება მოუხდა.

პროტესტი პარლამენტთან გაგრძელდა. მთავარი მოთხოვნა პარლამენტის თავმჯდომარის, ირაკლი კობახიძის გადადგომა იყო, რომელიც აწერდა ხელს ასამბლეის დღის წესრიგს. მას შემდეგ, რაც აქციის მონაწილეების მცირე ნაწილმა გააჟღერა მოთხოვნები პარლამენტში შესვლასთან დაკავშირებით, მათსა და პოლიციას შორის დაპირისპირება მოხდა. მოქალაქეების დიდი ნაწილი ამ პროცესში ჩართული არ ყოფილა. ხელისუფლებამ სპეცრაზმი გამოიყვანა, ისე, რომ ამის შესახებ ტერიტორიაზე შეკრებილი ადამიანები არ გააფრთხილა. გამოიყენეს რეზინის ტყვიები და ცრემლსადენი გაზი. შედეგად, რამდენიმე მოქალაქემ თვალი, ზოგმა კი მხედველობა დაკარგა. დაშავდა დაახლოებით 240 ადამიანი, მათ შორის, ჟურნალისტები.

გამოძიება ორი მიმართულებით მიმდინარეობს: ერთში აქციის მონაწილეებს პარლამენტში შეჭრას ედავებიან, მეორეში კი — სამართალდამცავებს ძალის გადამეტებას.