მოძრაობა ძალა ერთობაშიას ლიდერი, დავით ქაცარავა აცხადებს, რომ ხელისუფლება ორი წლის წინ მცხეთა-მთიანეთში საოკუპაციო ხაზის გადმოწევას არ ახმაურებს. მისი მტკიცებით, 42 ჰექტარი მიიტაცეს, თუმცა ამ დრომდე საზოგადოებისთვის ეს უცნობი იყო.

"ის ადგილი, რომელიც ჩვენ აღმოვაჩინეთ, ერთ-ერთი მონასტრის მიმდებარედ მდებარეობს.. თვითონ ამ მონასტრის წინამძღვარმა დაგვიდასტურა, რომ საოკუპაციო ხაზმა ფაქტობრივად მონასტრის კედლებთან ამოიწია", — წერს ქაცარავა.

სახელმწიფოს უსაფრთხოების სამსახურში On.ge-ს უთხრეს, რომ ორი წლის წინ საოკუპაციო ხაზის გადმოწევის შესახებ მათთვის ინფორმაცია ცნობილია, რასაც შესაბამისი რეაგირება მოჰყვა. სუს-ში აცხადებენ, რომ პროცესში სადამკვირვებლო მისიაა ჩართული, ხოლო სასულიერო პირებს საქმიანობის განხორციელებაში პრობლემები არ ექმნებათ.

როგორც ქაცარავა ფეისბუქზე წერს, მის მიერ მოპოვებულ ინფორმაციას ის დიპლომატიურ კორპუსს გადასცემს:

"მთავრობას გადავცემ თუ არა? რა საჭიროა, მას ეს ამბავი ნამდვილად არ აინტერესებს, უბრალოდ გაააქტიურებს ცხელ ხაზს და ევროკავშირის სადამკვირვებლო მისიას ჩააყენებს საქმის კურსში. ესაა ამ მთავრობის მაქსიმუმი და ზუსტად ამის ჩანერგვას ცდილობს ეს ხელისუფლება თავისი მოქალაქეების ტვინებში, რომ ბრძოლას არ აქვს აზრი და ჯობია ჩუმად ვიყოთ, ემანდ რუსი არ გაგვიბრაზდეს..."