პარლამენტში ქუთაისის მაჟორიტარი დეპუტატი, დიმიტრი მხეიძე ამბობს, რომ ბავშვები ჯარისკაცებად ბაღიდან და სკოლიდანვე უნდა აღიზარდონ. მან აღნიშნული ინიციატივით თავდაცვის მინისტრს, ირაკლი ღარიბაშვილს მიმართა და იმედი გამოთქვა, რომ ის ამ პრობლემას გადაწყვეტს.

"სკოლებში, ბაღებში, ოჯახებიდანვე უნდა გავზარდოთ ჩვენ ჯარისკაცებად ჩვენი ქართველები. ბევრი რაღაც სექტები და ორგანიზაციები დაარსდა, რომლებიც ეწინააღმდეგებიან ჯარში წასვლას და ახალისებენ ამას. თქვენ ისეთი პიროვნება ბრძანდებით, დარწმუნებული ვარ, იმნაირ ნაბიჯებს გადადგამთ, რომელიც ამ პრობლემას გადაწყვიტავს. ერთ-ერთი მიმართულება მე ვფიქრობ, ჩვენ უნდა დავბრუნდეთ სკოლაში, ასე ვფიქრობ, იმიტომ, რომ ახალგაზრდებს, თავიდანვე თუ არ შევუწყვეთ ხელი ჩვენ განვითარებაში, გაზრდილ ხეს ვერაფერს ვერ ვუზამთ, აი, როდესაც იზრდება, მაშინ უნდა შევუწყოთ ჩვენ ხელი", — განაცხადა მხეიძემ.

კიდევ ერთი დეპუტატი, ვინც ირაკლი ღარიბაშვილს სთავაზობს, რომ ბავშვებში პატრიოტული სულისკვეთების ამაღლებაზე იმუშაოს, სოფო კილაძეა. მისი თქმით, მნიშვნელოვანია, რომ ბავშვებში მოტივაცია ამაღლდეს.

დღეს პარლამენტში მინისტრი საათის ფორმატში ირაკლი ღარიბაშვილი იმყოფება. ღარიბაშვილის გამოსვლას არ ესწრება პოლიტიკური ბოიკოტის რეჟიმში მყოფი ევროპული საქართველოს და ნაციონალური მოძრაობის დეპუტატები.