დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, მისი დაკვირვებით, ავტობუსებში მგზავრები წესებს იცავდნენ, მიკროავტობუსში კი — არა.

"ამუშავდა საზოგადოებრივი ტრანსპორტი, მობილობის ყველაზე ძლიერი მექანიზმი, ანუ გაიზარდა მობილობა სერიოზულად. გუშინ მე ვაკვირდებოდი, ქალაქში როცა გადავადგილდებოდი, რამდენად იცავენ წესებს და გამიხარდა, რომ ავტობუსებში პატიოსნად იცავდნენ [წესებს], თუმცა არა მიკროავტობუსებში და გასაფრთხილებელია ეს ხალხი", — აღნიშნა მან.

მისივე თქმით, წესები დაცული იყო ერთ-ერთ საჯარო დაწესებულებაშიც. ის ყველა მოუწოდებს პანიკას არ აყვნენ, მაგრამ დაიცვან წესები.

"მოვუწოდებ საქართველოს საზოგადოებას, პანიკის არავითარი საფუძველი არ არის, ჩვენ ამ ეტაპზე ეპიდსიტუაცია არის სრულად მართვადი. გვექნება ახალი შემთხვევები, 3-5-10-15, არ არის ეს დიდი პრობლემა, მართვადია და ჯანდაცვის სისტემა ამას თავისუფლად მართვას და ყველა ადამიანი ნახავთ, რომ ძალიან ადრეულ ეტაპზე გამოჯანმრთელდება. ერთადერთი არის, რომ ძალაში რჩება სლოგანი, რომ ჩვენ უნდა ვისწავლოთ თანაცხოვრება კოვიდთან ერთად. მოგვიწევს ეს, კოვიდი დღეს, ხვალ, ზეგ არ გაქრება, არც ამ წლის ბოლომდე გაქრება", — თქვა გამყრელიძემ.

საქართველოში შეზღუდვების დიდი ნაწილი მოიხსნა ან მოხსნის პროცესშია. უკვე ამუშავდა საზოგადოებრივი ტრანსპორტი, უახლოეს პერიოდში კი იხსნება ტანსაცმლის მაღაზიები, მოლები, ასევე, კაფეები და სასტუმროები.