დაავადებათა კონტროლის ეროვნული ცენტრის დირექტორი, ამირან გამყრელიძე ამბობს, რომ შეზღუდვების შემსუბუქების შემდეგ კორონავირუსით ინფიცირებულთა რაოდენობის ზრდა მოსალოდნელი იყო. ასე ეხმაურება ის დღეს 11 ახალ დადასტურებულ შემთხვევას.

"ეს არ არის ის რიცხვი, რომელსაც ჩვენ ვერ მოვერევით და ვერ ვმართავთ, ამიტომ არ არის ერთის მხრივ არ არის არავითარი საშიშროება, მაგრამ მეორეს მხრივ, მეტი სიფრთხილე გვმართებს, რამეთუ შეზღუდვების შემსუბუქების შემდეგ მოსალოდნელიც იყო და არის, რომ შემთხვევების რაოდენობამ იმატოს, მაგრამ ეს მატება ყოველთვის არის მართვადი და იქნება მართვადი, მინდა დაგარწმუნოთ", — თქვა გამყრელიძემ.

ამასთან, მან აღნიშნა, რომ 11-დან 9 ინფიცირებული ერთი ოჯახის წევრია ან მათი ახლობელი. ინფიცირებულია ერთ-ერთი კლინიკის თანამშრომელიც. ამირან გამყრელიძის თქმით, მიმდინარეობს შესწავლა, ის არის ოჯახში ინფექციის პირველწყარო თუ სხვა.

NCDC-ის ხელმძღვანელმა აღნიშნა ისიც, რომ უკვე გამოკვლეულია ოჯახთან კონტაქტში მყოფი 50 ადამიანი და კვლევა კვლავ გრძელდება.