პრემიერ-მინისტრის, გიორგი გახარიას განცხადებით, სოციალური დახმარების დარიგებისას ისინი უპასუხისმგებლოდ არ მოქცეულან და არ უთქვამთ, რომ 1 000 ლარს მიიღებს ოჯახი, 5 000-ს პეტრე ან პავლე. ამ ფორმით უპასუხა პრემიერმა პარლამენტის ტრიბუნიდან ოპოზიციას, რომელთა წარმომადგენლები აქამდე აცხადებდნენ, რომ სოციალური დახმარება მეტი უნდა იყოს.

"ეს იყო, უბრალოდ, ადამიანს რომ გაუჭირდა, შოკში რომ შევიდა მისი ყოველდღიური შემოსავალი, ჩვენ ადამიანს პირდაპირ, სოციალურად დავეხმარეთ.

ეს არ იყო, რაღაც უპასუხისმგებლო განცხადებები, რომ ამდენს მოგცემთ და 1 000 ლარი ოჯახს, 5 000 ლარი იმას, რა ქვია, პეტრეს და მერე პავლეს კიდე", — განაცხადა მან.

მისი თქმით, იცის, რომ ეს არ არის საკმარისი თანხა, მაგრამ ეს არის მინიმუმი იმისთვის, რომ მათ ყოველდღიურ გასავალში მდგრადობა იყოს.

დღეს, 27 მაისს პრემიერ-მინისტრი პარლამენტის წინაშე მოხსენებით წარსდგება. ის კორონავირუსის პანდემიის წინააღმდეგ გადადგმულ ნაბიჯებსა და უწყებათაშორისი საკოორდინაციო საბჭოს გატარებულ ზომებზე საუბრობს.