პარლამენტის ყოფილი თავმჯდომარე, ირაკლი კობახიძე პოლიტიმრების გათავისუფლებასთან დაკავშირებით ამერიკელი სენატორის წერილს გამოეხმაურა. მისი თქმით, ოპოზიცია საერთაშორისო პარტნიორებს არასწორ ინფორმაციას აწვდის.

ირაკლი კობახიძემ გადაცემა არენაში წაიკითხა 2012 წლის წერილი, როცა ამერიკელი სენატორები ნაციონალური მოძრაობის წევრების დაკავებას პოლიტიკურად მოტივირებულს უწოდებდნენ.

"ეს წერილები არ არის უცხო, ამ წერილებს აწერს ხელს, მათ შორის სენატორი [ჯიმ] რიში. გვარები ძალიან ხშირად მეორდება ხოლმე, არის სენატორი რიში, არის ევროპარლამენტარი კუბილიუსი და ა.შ. სულ ვტრიალებთ ერთსა და იმავე ათ გვარში. ეს ნიშნავს, რომ ერთი და იგივე ხაზი აქვს გაჭრილი ოპოზიციას, ნაციონალურ მოძრაობას თავისი განშტოებებით და ის მუშაობს ამ ხაზებით. აქვს გარკვეული კონტაქტები და ისინი მუდმივად ახერხებენ ამ კონკრეტული ადამიანებისთვის, რომლებსაც დიდ პატივს ვცემთ, არასწორი ინფორმაციის მიწოდებას", — ამბობს კობახიძე.

მისივე თქმით, ნაციონალური მოძრაობა 2012 წელს სენატორ რიშს არწმუნებდა, რომ მიხეილ სააკაშვილის, ზურაბ ადეიშვილის, ვანო მერაბიშვილისა და ადეიშვილების მიმართ პოლიტიკური დევნა იყო დაწყებული.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ოპოზიციის საპასუხოდ, ქართულ ოცნებაში საგანგებო ბრიფინგი ჩაინიშნა, სადაც პარლამენტის თავმჯდომარემ თქვა, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

აშშ-ს კონგრესში საქართველოს მეგობართა ჯგუფის თავმჯდომარე, ადამ კინზინგერმა კი ტვიტერზე დაწერა, რომ შეთანხმების საბოლოოდ შესრულება აუცილებელია. განცხადება გააკეთა აშშ-ს სენატის საგარეო ურთიერთობათა კომიტეტის თავმჯდომარემაც. სენატორი რიში აცხადებს, რომ საქართველოსგან ელოდება 8 მარტის შეთანხმების შესრულებას, რაც "პოლიტიკური პატიმრების გათავისუფლებასაც მოიცავს".

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.