კოკა ყანდიაშვილი ესპერსონასთან და მასთან დაკავშირებული ფეისბუქგვერდებისა და ანგარიშების წაშლას ეხმაურება. მისი მტკიცებით "პოლიტიკურად ანგარიჟებული ორგანიზაციების" მიზანი, რომლებმაც ფეისბუქს მასალები მიაწოდეს, ზიანი მიეყენებინათ მისთვისა და ესპერსონასთვის.

"თუმცა ჩვენ ვაგრძელებთ მუშაობას ფეისბუქთან და დარწმუნებული ვარ, რომ ამათ ტყუილებს მალე მოეღება ბოლო. მინდა აღვნიშნო, რომ ახლო მომავალში, ჩემს ახალგაზრდა და ძალიან ნიჭიერ გუნდთან ერთად, უფრო საინტერესო მედია პროდუქტებს შევთავაზებთ ჩვენს საზოგადოებას. ასევე მჭიდრო თანამშრომლობას გავაგრძელებთ ფეისბუქთან, გუგლთან და სხვა სოციალურ ქსელებთან, რათა ნამდვილად ეფექტური იყოს ფეიკ ნიუსებთან, რუსულ პროპაგანდასთან და საზოგადოების შეცდომაში შეყვანის მცდელობასთან ბრძოლა", — აცხადებს ყანდიაშვილი.

რაც შეეხება ქართულ ოცნებასთან თანამშრომლობას, ყანდიაშვილი ამბობს, რომ 2014 წლიდან ის აღარაა საჯარო პირი და არც პარტიის თანამშრომელი ყოფილა ოდესმე:

"ყველამ კარგად იცის, რომ საჯაროდ ვაქტიურობ ყველა საარჩევნო კამპანიის დროს, მე ვიყავი ქართული ოცნების ერთ-ერთი ყველაზე აქტიური მხარდამჭერი შექმნის დღიდან და ასე იქნება მომავალშიც. ძალიან ბევრი მეგობარი მყავს ამ გუნდში და პარტიასაც ხშირად ვსტუმრობ".

მისივე თქმით, ნაციონალი მოძრაობა მას ყველა ხერხით ებრძვის:

"დიახ, ზუსტად ნაციონალური მოძრაობის მიზანი იყო, ჩამოვეშორებინე ჩემს საყვარელ საქმეს —ტელევიზიას… გამოუვიდათ კიდეც. მაგრამ, ვერავინ ამიკრძალავს შევქმნა მედია საშუალებები და ხალხს გავაგებინო სიმართლე, რომელიც ხან პარტიებს არ მოსწონთ და ხანაც ბიზნესებს…"

დღეს, 6 მაისს ქართული ოცნების დეპუტატმა, მამუკა მდინარაძემ Facebook-ის ანგარიშს სპეციალური ბრიფინგი მიუძღვნა, თუმცა მხოლოდ ნაციონალურ მოძრაობასთან დაკავშირებული გვერდების წაშლაზე ისაუბრა. ჟურნალისტების კითხვის დასმამდე, მას არ უხსენებია კოკა ყანდიაშვილის ესპერსონასთან დაკავშირებული გვერდების წაშლა. ის ყანდიაშვილს გაემიჯნა, მიუხედავად იმისა, რომ წლების წინ მათი PR ტექნოლოგი იყო.

5 მაისს გამოქვეყნდა Facebook-ის ანგარიში, რომელშიც განმარტებული იყო, რომ კომპანიამ ნაციონალურ მოძრაობასთან და კოკა ყანდიაშვილის მედია ესპერსონასთან დაკავშირებული ფეისბუქგვერდები წაშალა. ფეისბუქის განცხადებით, გაუქმდა 80 გვერდი, 23 პირადი ანგარიში, 41 ჯგუფი და 9 ინსტაგრამანგარიში, რომელიც გამოძიებამ ენმ-სთან ასოცირებულ ინდივიდებთან დააკავშირა.

"მოცემული ქმედებების უკან მდგომი ინდივიდები კონტენტზე კომენტარის გასაკეთებელად და ჯგუფებისა თუ გვერდების სამართავად იყენებდნენ ავთენტური და არაავთენტური ანგარიშების კომბინაციას. გვერდების ნაწილი კი მოქმედებდა როგორც დამოუკიდებელი მედიასაშუალება.

უმეტესწილად, მათ მიერ განთავსებული კონტენტი ეხებოდა ლოკალურ მიმდინარე მოვლენებსა და პოლიტიკურ თემებს, როგორებიცაა 2018 წლის არჩევნები, ქართული მართლმადიდებლური ეკლესია, მოქმედი ხელისუფლების პანდემიის მართვის ტაქტიკის კრიტიკა და სხვა. მოცემული გვერდების ნაწილს 2018 წლის შემდგომ არ უმოქმედია", — წერია კომპანიის განცხადებაში.