ერთიანი ნაციონალური მოძრაობა აცხადებს, რომ პარტია არც მართავდა, არც მართავს და არც მომავალში აპირებს არაიდენტიფიცირებადი გვერდებით ოპერირებას. ასე ეხმაურება ენმ Facebook-ის მიერ მათთან დაკავშირებული გვერდების წაშლას.

პარტიის განცხადებაში აღნიშნულია, რომ მიესალმებიან ყალბი და არაიდენტიციფირებადი გვერდების, ფეიქ-ინფორმაციების გავრცელების აღკვეთას. ოპოზიციური პარტია მიუთითებს იმაზეც, რომ სწორედ ნაციონალური მოძრაობა და პარტიის ლიდერები არიან მსგავსი გვერდების ერთ-ერთი მთავარი სამიზნე.

"ჩვენ კატეგორიულად ვაცხადებთ, რომ ნაციონალური მოძრაობა არც მართავდა, არც მართავს და არც მომავალში აპირებს არაიდენტიფიცირებადი გვერდებით ოპერირებას. ჩვენთვის მსგავსი მეთოდებით პოლიტიკის კეთება მიუღებელია. მხარს დავუჭერთ ყველა რადიკალურ ღონისძიებას, რომელიც შეზღუდავს ყალბი ინფორმაციის გავრცელებას სოციალურ ქსელში. ნებისმიერი ასეთი გვერდი, მიუხედავად იმისა, რა პოზიციას იკავებს ამ გვერდის ადმინისტრატორი, უნდა გაუქმდეს", — ამბობენ პარტიაში.

ნაციონალური მოძრაობა ასევე ამბობს, რომ მათი უმთავრესი პრინციპია საჯარო, გამჭვირვალე, დემოკრატიულ ღირებულებებზე დაფუძნებული პოლიტიკური აქტივობებით დაამარცხონ ქართული ოცნება სამართლიან არჩევნებში და "ხელისუფლების აგრესიულ ფეიკ კამპანიას" დაუპირისპირონ მათი "თანმიმდევრული და მკაფიო გეგმა".

"მოვუწოდებთ პოლიტიკურ პარტიებს და პოლიტიკურ ლიდერებს, განსაკუთრებით მათ, ვინც ერთ დროს ნაციონალური მოძრაობას წარმოადგენდნენ და კარგად იციან, როგორ საქმიანობდა და საქმიანობს პარტია, თავი შეიკავონ მთავარ ოპოზიციურ პარტიაზე თავდასხმისგან. ჩვენმა მოქალაქეებმა კარგად იციან, რომ საქართველოში ფეიკ ინფორმაციის და სიძულვილის გაღვივების წყაროები ლაშა ნაცვლიშვილის, კოკა ყანდიაშვილის და შალვა რამიშვილის ავტორობით, ერთი მხრივ, რუსეთის ფედერაცია და მეორე მხრივ, ქართული ოცნება არიან", — აღნიშნავენ პარტიაში.