ყოფილი სასულიერო პირი, ბასილ კობახიძე ამბობს, რომ ბოლნისის მუნიციპალიტეტში მთავრობა რელიგიურ და ეთნიკურ შუღლს აღვივებს. როგორც კობახიძე ფეისბუქზე წერს, სახელმწიფო უსაფრთხოების სამსახურის ხელით ამირან გამყრელიძეს ალაპარაკებენ.

"ჩასვრილი მთავრობა ეკლესიას ვერაფერს უბედავს, რომელიც საჯაროდ ავირუსებს ადამიანებს და ყველაზე შეგნებულ ხალხს, მუსლიმებს ურტყავს, რომლებმაც კარანტინზე დაკეტეს მეჩეთები. მთავრობას ასე უნდა არჩევნების მოგება და მართლმადიდებლურ-ეთნიკური ტოტალიტარიზმის დამყარება", — წერს ბასილ კობახიძე.

გუშინ, პირველ მაისს ბოლნისის სოფელ მუშევანში ადგილობრივმა მოსახლეობამ ექიმებს კორონავირუსით ინფიცირებულთა კლინიკაში გადაყვანის საშუალება არ მისცეს. როგორც On.ge-ს ბოლნისის მაჟორიტარმა დეპუტატმა, გოგი მეშველიანმა განუცხადა, ინფიცირებულთა გადაყვანაში ეპიდემიოლოგებს ხელი ადგილობრივმა ახალგაზრდებმა შეუშალეს, რომლებიც ნასვამ მდგომარეობაში იმყოფებოდნენ.

ინფიცირებულები უკვე დღეს კლინიკაში გადაიყვანეს.

მარნეულში დაავადებათა კონტროლის ცენტრის თანამშრომლები ქვემო ქართლის ოფიციალურ პირებს შეხვდნენ. შეხვედრაზე ცენტრის ხელმძღვანელმა, ამირან გამყრელიძემ აღნიშნა, რომ მათ მიაწოდეს ინფორმაცია, რომ მუშევანში პოლიტიკურ პროცესებს ჰქონდა ადგილი და რელიგიურმა ლიდერებმაც ითამაშეს გარკვეული როლი.

"ასე მოგვცეს ინფორმაცია, რომ თითქოს მათი მოლა და მუფთი თანამშობს ცუდ როლსო".

ამავე დროს, გუბერნატორის შოთა რეხვიაშვილის თქმით, ბოლნისის მუნიციპალიტეტში მომხდარი ინციდენტი ერთეული შემთხვევაა. როგორც რეხვიაშვილი აღნიშნავს, ქვემო ბოლნისის თემში რელიგიურმა ლიდერებმა მხარდამჭერი როლი ითამაშეს და ინფორმაციის გავრცელებაში დაეხმარნენ.

მუშევანის შემთხვევასთან დაკავშირებით გამოძიება სისხლის სამართლის 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს. უწყებაში აცხადებენ, რომ დაზიანებულია ორი სატრანსპორტო საშუალება.