ევროპული საქართველოს წევრი, ზურაბ ჭიაბერაშვილი ამბობს, რომ მთავრობამ თვითონვე დაუკარგა საგანგებო მდგომარეობას ის წონა და მნიშვნელობა, რასაც თავიდან თავადვე ანიჭებდა.

მისი თქმით, რისთვისაც მთავრობამ საგანგებო მდგომარეობა შემოიღო, იქ აღსრულება ვერ შეძლო და საბოლოო ჯამში, შეზღუდვებით "ჯოხი გადატეხა" იმ ადამიანებზე, რომლებიც ფიზიკური დისტანცირებისთვის აუცილებელ რეკომენდაციებს საგანგებო მდგომარეობის გარეშეც ემორჩილებიან.

"მთავრობამ საგანგებო მდგომარეობა შემოიღო იმ დარჩენილი 5-10%-ისთვის, რომელთაც სჭირდებათ მაინცდამაინც მთავრობის მხრიდან დაძალება, ოღონდ ვხედავთ, რომ ეს დაძალება არ გამოვიდა. ვხედავთ, რომ მთავრობამ რისთვისაც შემოიღო ეს საგანგებო მდგომარეობა, რომ, მაგალიათად, იგივე რელიგიური რიტუალები წელს განსხვავებულად ჩატარებულიყო, ამის აღსრულება ვერ უზრუნველყო", — განუცხადა რუსთავი 2-ს ჭიაბერაშვილმა.

პარლამენტი საგანგებო მდგომარეობის გახანგძლივებაზე ოთხშაბათს, 22 აპრილს იმსჯელებს. უკვე ცნობილია, რომ მთავრობის გადაწყვეტილებას საპარლამენტო უმრავლესობა მხარს დაუჭერს.