დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

თბილისის ინფექციური საავადმყოფოს ბოქსირებული განყოფილების უფროსის თქმით, თუ საქართველოში კორონავირუსით ბევრი ადამიანი დაინფიცირდება, ვერც ჩვენი ჯანდაცვის სისტემა მოუვლის. ამის შესახებ მარინა ენდელაძემ ტელეკომპანია პალიტრას ეთერში ისაუბრა.

"ძალიან ბევრი პაციენტი ჩემთან და სხვა ექიმებთან რეკავს საზღვარგარეთიდან, რომლებსაც აქვთ სერიოზული სიმპტომები და ვერ ახერხებენ მათთან მისვლას, ვერც ნაცხის აღებას, ვერც მკურნალობას. ვეცადოთ, რომ ჩვენც არ დაგვემართოს ასე. თუ უმართავი გახდა და ბევრი ადამიანი დაინფიცირდა, ვერც ჩვენი ჯანდაცვის სისტემა ვერ მოუვლის ამას", — თქვა ექიმმა.

მარინა ენდელაძემ ასევე აღნიშნა, რომ აქამდე შეკავების პროცესი საქართველომ კარგად შეასრულა, თუმცა, თუ მოსახლეობა რეკომენდაციებს არ დაიცავს, "შეიძლება დრამატულად განვითარდეს მდგომარეობა".

"ახლა ჩვენ შევდივართ პიკურ ფაზაში. საბედნიეროდ, ძალიან კარგად შევასრულეთ შეკავების პროცესიც, ასევე, გავრცელების. საბედნიეროდ, ჯერჯერობით არ გვაქვს დრამატული შედეგები, მაგრამ, თუ მოსახლეობამ ვერ გაითავისა რეკომენდაციები, რაც ახლა არის მოწოდებული, ნამდვილად შეიძლება დრამატულად განვითარდეს მდგომარეობა, იმდენად, რომ ვეღარ მოახერხოს საქართველოს ჯანდაცვის სისტემამ ამ პაციენტების მოვლა", — თქვა მან.

ინფექციური საავადმყოფოს ბოქსირებული განყოფილების უფროსმა მოსახლეობას მოუწოდა დარჩნენ სახლში და დაიცვან დისტანცია. მან კიდევ ერთხელ აღნიშნა, რომ ეს ძალიან მნიშვნელოვანია.

დღეს, 15 აპრილს სახელმწიფომ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. საპატრიარქოს პრესსპიკერის, ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 71, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: