საპატრიარქოს პრესსპიკერის, დეკანოზ ანდრია ჯაღმაიძის თქმით, იმედი აქვთ, რომ მრევლი სამოქალაქო პასუხისმგებლობას გამოიჩენს და რეკომენდაციებს ამჯერადაც ზედმიწევნით გაითვალისწინებს. ამ თემაზე ანდრია ჯაღმაიძემ ჟურნალისტებთან ისაუბრა.

"ყველამ უნდა გამოვიჩინოთ სამოქალაქო პასუხისლმგებლობა სხვებისთვისაც, ჩვენი ახლობლებისთვის, მოქალაქეების წინაშე და ამიტომ იმედი გვაქვს, რომ, როგორც ამ წინა რეკომენდაციების გათვალისწინება ხდებოდა მრევლის მხრიდან, ვნახეთ, რომ ზედმიწევნით იცავდნენ სოციალურ დისტანციას, ასევე, იქნება ტაძრებში დაცული დისტანცია", — თქვა ანდრია ჯაღმაიძემ.

ანდრია ჯაღმაიძის განცხადებით, დიდ ტაძრებში ორი მეტრის დისტანცია უნდა იყოს, პატარა ტაძრებში კი მრევლი მაქსიმალურად ეზოში განთავსდეს.

დეკანოზის თქმით, ჯანდაცვის სამინისტროსა და დაავადებათა კონტროლის ეროვნული ცენტრის რეკომენდაციები ზედმიწევნით უნდა გაითვალისწინონ მათ, ვისაც სახლში რისკჯგუფის ადამიანი ჰყავთ. მისი განცხადებით, ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, რომ ყველა წესი გაითვალისწინონ.

დღეს, 15 აპრილს სახელმწიფომ და საპატრიარქომ გადაწყვიტეს, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება. საპატრიარქოს პრესსპიკერის, ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ბოლო მონაცემებით, საქართველოში კორონავირუსით ინფიცირებულია 306 ადამიანი, მათ შორის გამოჯანმრთელებულია 71, ხოლო გარდაცვლილია 3 ადამიანი. კარანტინის რეჟიმში 4 990 პირი რჩება, სტაციონარში მეთვალყურეობის ქვეშ კი 462.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: