საქართველოს შინაგან საქმეთა მინისტრი ამბობს, რომ როგორც მან იცის, საგანგებო მდგომარეობის პირობების დარღვევის გამო დაჯარიმებულებს თანხის გადასახდელად ერთთვიანი ვადა აქვთ.

"ჩამოწერაზე ვერაფერს ვიტყვი რა თქმა უნდა, თუმცა, როგორც ვიცი, ერთი თვე აქვს ამ ჯარიმას გადახდის ვადა, 3 000-ლარიანი დარღვევა რაც არის და ასევე, იურიდიულ პირზე 15 000-ლარიანი ჯარიმა. ერთი თვის ვადა აქვს, როგორც მე ვიცი", — თქვა ვახტანგ გომელაურმა მედიასთან.

საქართველოს შინაგან საქმეთა სამინისტრომ ორი დღის წინ, 7 აპრილს გაავრცელა განცხადება, რომ პირებმა, რომლებიც საგანგებო მდგომარეობის რეჟიმის დარღვევისთვის დაჯარიმდებიან, თანხა 30 დღის ვადაში უნდა გადაიხადონ.

საგანგებო მდგომარეობის რეჟიმის დარღვევისთვის ფიზიკურ პირი 3 000 ლარით ჯარიმდება, ხოლო იურიდიული პირი – 15 000 ლარით. განმეორებით შემთხვევაში სისხლის სამართლის პასუხისმგებლობა დგება.