უკვე რვა წელი გავიდა, რაც ვისტერია ლეინის მცხოვრებლებს და გარეუბნის ამ ქუჩაზე დატრიალებულ მრავალ მისტიკურ, ტრაგიკულ, სევდიან, რომანტიკულ თუ კრიმინალურ ისტორიას დავემშვიდობეთ.

თუმცა მსოფლიოში არსებულმა ამჟამინდელმა მდგომარეობამ სასოწარკვეთილ დიასახლისებსაც კი უბიძგა, რომ კვლავ გაერთიანებულიყვნენ და საქველმოქმედო ფონდისთვის შექმნილ ონლაინ გადაცემაში მიეღოთ მონაწილეობა.

Deadline-ის ცნობით, მსახიობები ონლაინ რეჟიმში ჩაერთევებიან გადაცემას, რომლის მიზანიც პანდემიის გამო კინოინდუსტრიაში დაზარალებული დასაქმებულების დახმარებაა. ამ ინიციატივაში სასოწარკვეთილი დიასახლისების ისეთი მსახიობები მიიღებენ მონაწილეობას, როგორებიც არიან ევა ლონგორია (გაბი), მარშა ქროსი (ბრი), ბრენდა სტრონგი (მერი ელისი), ვანესა უილიამსი (რენე) და დანა დილეინი (კეტრინი).

ამ ერთ-ერთი ყველაზე საკულტო სატელევიზიო შოუს მსახიობები პირდაპირ ეთერში გაიხსენებენ მათ პირად გამოცდილებას სერიალში მონაწილეობასთან დაკავშირებით, რომელიც 8 სეზონის განმავლობაში 2004 წლიდან 2012 წლამდე გადიოდა.

სამწუხაროდ, ამჯერად ჩვენს საყვარელ სახეებთან ერთად ვერ ვიხილავთ ტერი ჰატჩერს (სუზანი) და ფელისიტი ჰოფმანს (ლინეტი). როგორც ჩანს, სამეზობლოში კვლავ რაღაც შუღლი ჩამოვარდა...

ფოტო: Giphy

როგორც ვიცით, გასულ წელს ფელისიტი ჰოფმანს კოლეჯის სკანდალის საქმეში მონაწილეობისთვის 14-დღიანი პატიმრობა მიესაჯა. ტერი ჰატჩერი კი, როგორც უცხოურ მედიაში ხშირად წერდნენ, ადრეც არ გამოირჩეოდა სამსახიობო გუნდთან კარგი ურთიერთობით. შესაბამისად, ალბათ, სწორედ ამის გამო ვერ ვიხილავთ მათ საყვარელ მსახიობებთან ერთად.

გადაცემა 12 აპრილს აშშ-ს დროით საღამოს 8 საათზე გავა YouTube-ის ამ არხზე.