საქართველოს პრემიერმინისტრის თქმით, ყველა კომპანია, რომელიც დაადასტურებს, რომ უსაფრთხოების ნორმებს აკმაყოფილებს, ფუნქციონირებას შეძლებს. ეს განცხადება გიორგი გახარიამ ონლაინ მაღაზიების შესახებ საუბრისას გააკეთა და აღნიშნა, რომ ქვეყანაში ამ სერვისის განვითარებას მიესალმება.

"მაგრამ აქ არის ძალიან მარტივი მოთხოვნა — დავაკმაყოფილოთ უსაფრთხოების ელემენტარული ნორმები, რომელსაც გვიდგენს ჯანდაცვის სამინისტრო. ეს არის კრიტიკულად მნიშვნელოვანი და ყველა იმ კომპანიას, რომელიც შეძლებს დაადასტუროს, რომ აკმაყოფილებს უსაფრთხოების ამ ნორმებს, რა თქმა უნდა ექნება საშუალება, რომ გააგრძელოს ფუნქციონირება", — თქვა მან.

გახარიამ კიდევ ერთხელ აღნიშნა, რომ მთავრობა ახლა ორ ფრონტზე იბრძვის: მოქალაქეების ჯანმრთელობა და ეკონომიკა. მისი თქმით, "ორივე ფრონტი არის უკიდურესად მნიშვნელოვანი".

საქართველოს მთავრობის 30 მარტის დადგენილებით საქმიანობის უფლება მიეცა მხოლოდ სურსათის, საყოფაცხოვრებო ქიმიისა და იმ პროდუქციის მაღაზიებს, რომელთა რეალიზაცია მთავრობამ აუცილებლად მიიჩნია. მათ შორის არის საკვები, სურსათი, სამედიცინო პროდუქტები და სხვა. საოჯახო ტექნიკის, წვრილი საყოფაცხოვრებო პროდუქციისა თუ სხვა ტიპის მაღაზიებმა კი განცხადებები გაავრცელეს, სადაც საქმიანობის დროებით შეჩერების შესახებ იტყობინებოდნენ.

2 აპრილს მთავრობის ახალი დადგენილება გავრცელდა, რომლის მიხედვით, საგანგებო მდგომარეობის პერიოდში ონლაინვაჭრობა კომპანიების ნაწილს აღარ შეეზღუდება.

დოკუმენტში ვკითხულობთ, რომ დასაშვებია ნებისმიერი ეკონომიკური საქმიანობა, დისტანციურად, მხოლოდ სახლიდან გაუსვლელად. მთავრობის ადმინისტრაციაში გამართულ ბრიფინგზე ეკონომიკის მინისტრმა ნათია თურნავამ განმარტა, რომ ყველა კომპანია, რომელიც უსაფრთხოების წესებს დაიცავს შეძლებს ონლაინგაყიდვებზე გადავიდეს. გარდა ამისა, მინისტრმა განმარტა, რომ ისინი კონკრეტულ წესებს შესთავაზებენ ყველას, ვისაც ონლაინგაყიდვებზე გადასვლა შეეძლება.