BBC America-ს თრილერის ჟანრის გახმაურებული სერიალი, Killing Eve ახალი ნაწილით იმაზე ადრე გამოვა ტელეეკრანებზე, ვიდრე ამას ელოდით. მილიონობით მაყურებლის საყვარელი შოუ მესამე სეზონით 26 აპრილის ნაცვლად 12 აპრილს დაბრუნდება.

ამის შესახებ ინფორმაცია სერიალის ოფიციალურ ტვიტერზე გამოქვეყნდა:

"ჩვენ სიურპრიზებს დაგპირდით. Killing Eve ახალი სეზონით BBC America-სა და AMC-ზე 12 აპრილს გამოვა".

შოუს შემქმნელებმა მესამე სეზონი ოფიციალურად ვალენტინობის დღეს, 14 თებერვალს დააანონსეს და გამოსვლის თარიღიც მაშინ გაგვიმხილეს — 26 აპრილი, თუმცა თვითიზოლირებული მსოფლიოსთვის კარგი სიურპრიზის გაკეთება გადაწყვიტეს და პრემიერა დააჩქარეს. ესეც სერიალის უახლესი ტიზერი:

სცენარზე ამჯერად სუზან ჰეთკოტმა იმუშავა, რომელსაც მანამდე სერიალების Fear the Walking Dead-სა და See-ს შექმნაშიც მიუღია მონაწილეობა.

"მიხარია, რომ მესამე სეზონის შექმნაზე კიდევ ერთი შესანიშნავი სცენარისტი მუშაობდა. შეგვიძლია დარწმუნებულები ვიყოთ, რომ პერსონაჟების ბედი სუზან ჰეთკოტის სასტიკ ხელებში უსაფრთხოდ იქნება" — განაცხადა ყველასთვის საყვარელი სერიალების, Fleabag-ისა და Killing Eve-ის მთავარმა შემოქმედმა, ფიბი უოლერ-ბრიჯმა.

მთავარი უცვლელია, მესამე სეზონში კვლავ ვიხილავთ ჯოდი კომერს, სანდრა ოსა და ფიონა შოუს.

ფოტო: BBC America

ამავე თემაზე: