დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ კორონავირუსზე საყოველთაო ტესტირებას არც ერთი ქვეყანა არ აწარმოებს. ამის შესახებ მან მთავარის ეთერში ისაუბრა.

"გერმანიის მოსახლეობა 82 მილიონია. კორეის მოსახლეობა არის 50 მილიონი. სამხრეთ კორეას დღემდე ჩატარებული აქვს 350 ათასი ტესტირება, ყველა ერთად აღებული — სწრაფიც, ოქროს სტანდარტიც და ა.შ. გერმანიაში ჩატარებულია 250 ათასი ტესტი. ნახეთ ახლა 250 ათასი 82 მილიონზე, თუ ამას დაარქმევთ საყოველთაოს", — აღნიშნა გამყრელიძემ.

როგორც ის ხსნის, იმის გამო, რომ მარნეულსა და ბოლნისში ვირუსის პირველწყაროზე ვერ გავიდნენ, იქ გაფართოებული ტესტირებაა ჩასატარებელი. გამყრელიძის განმარტებით, ტესტირება უნდა ჩაუტარდეს ყველას, ვისაც აღენიშნება სიცხე ან მძიმე პნევმონია.

"თავიდან ყველა ქვეყანამ დაიწყო ოქროს სტანდარტზე, ანუ PCR-ზე დამყარებული ტექნოლოგიით [ტესტირება]. მერე შემუშავდა სწრაფი ტესტი. არის ორი ტიპის ანტისხეული, რომელიც ორგანიზმში ვითარდება, ზოგადად, ინფექციების დროს. არის IGG, ანუ იმონუგლობულინ G-ს ანტისხეული, რომელიც მიუთითებს რომ დაავადება გადატანილი გაქვს და შეიძლება გამოჯანმრთელებული ხარ. არის მეორე IGM, ანუ იმონუგლობულინ M-ზე დამყარებული, რომელიც გეუბნება, რომ მწვავე რეაქციაში ხარ. IGM ჩნდება ორგანიზმში ინფექციის დაწყებიდან მეხუთე, მეექვსე, მეშვიდე დღეს. როდესაც ოქროს სტანდარტი, რასაც საქართველოში ვაკეთებთ, იჭერს პირველ, მეორე დღეს და ხანდახან უსიმპტომო სტადიაში. ამიტომ ქვეყანაში უდნა იყოს ყველა სახის ტესტი", — ამბობს ამირან გამყრელიძე.

საქართველოში კორონავირუსისგან უკვე 9 პაციენტი გამოჯანმრთელდა. ამ დროის მონაცემებით, დაინფიცირებულია 67 ადამიანი. კარანტინის რეჟიმში არის 4 055 პირი, ხოლო სტაციონარში მეთვალყურეობის ქვეშ 252 პაციენტი რჩება.

კორონავირუსის გავრცელების გამო ქვეყანაში საგანგებო მდგომარეობაა გამოცხადებული და სხვადასხვა აკრძალვებია დაწესებული, მათ შორის აკრძალულია 10-ზე მეტი ადამიანის შეკრება.

მას შემდეგ, რაც გაირკვა, რომ მარნეულში ინფიცირებულ პირს, ათეულობით ადამიანთან ჰქონდა კონტაქტი, საკოორდინაციო უწყებათაშორისი საბჭოს გადაწყვეტილებით, მარნეულისა და ბოლნისის რაიონებში მკაცრი საკარანტინო რეჟიმი გამოცხადდა. ჩაიკეტა ორივე რაიონის შესასვლელი, რომელსაც სამხედროები და შსს-ს თანამშრომლები აკონტროლებენ. ასევე, გაიშალა საველე ჰოსპიტლები.

ჯანდაცვის სამინისტროს დაევალა, მარნეულსა და ბოლნისში დაიწყოს ტესტირების სპეციალური პროგრამა.

გარდა ამისა, მთავრობის გადაწყვეტილებით, საქალაქთაშორისო გადაადგილება აიკრძალა ყველა სახის ტრანსპორტით, გარდა პირადი ავტომობილებისა. თბილისის მერიის გადაწყვეტილებით კი შეზღუდვები დაწესდა ტაქსებზე. კერძოდ, მხოლოდ 2 მგზავრის გადაყვანა შეიძლება უკანა სავარძლებზე და ფანჯრები უნდა იყოს ღია.

23 მარტს ცნობილი გახდა, რომ მთავრობის განკარგულებით, საქართველოს ავიახაზები 2 კვირის განმავლობაში მსოფლიოს 6 ქალაქიდან ჩამოიყვანს მგზავრებს. მთავრობის მოთხოვნით, ბილეთის ფასი არ უნდა აღემატებოდეს €199-ს.

• ნახეთ ფრენების განრიგი

საგანგებო მდგომარეობის გამოცხადებამდეც, მთავრობას კორონავირუსის პრევენციისთვის დაწესებული ჰქონდა არაერთი შეზღუდვა. კერძოდ:

• მუშაობა შეწყვიტა ყველა სავაჭრო ობიექტმა სასურსათო მაღაზიების, სააფთიაქო და საფოსტო ქსელების, ბენზინგასამართი სადგურებისა და ბანკების გარდა;
• აიკრძალა სამარშრუტო ტაქსების გადაადგილება;
• საზღვარი დაკეტილია ყველა უცხო ქვეყნის მოქალაქისთვის;
• საჰაერო მიმოსვლა შეწყდა ყველა კომპანიისთვის საქართველოს ავიახაზების გარდა;
• ყველას, ვინც საქართველოს საზღვარს გადმოკვეთს, კარანტინში გაუშვებენ;
• საჯარო დაწესებულებების ნაწილმა, მათ შორის, შსს-ს მომსახურების სააგენტომ და იუსტიციის სახლმა მომსახურებები შეზღუდა;

გარდა ამისა, როგორც კერძო, ისე საჯარო სექტორს მიცემული აქვს რეკომენდაცია დისტანციურ მუშაობაზე. 70 წელზე ზევით მოხუცებს კი თვითიზოლაცია ურჩიეს.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე:

• აუცილებელი რეკომენდაციები კორონავირუსისგან თავის დასაცავად
• რეკომენდაციები თვითიზოლაციაში მყოფი პირებისთვის
• რეკომენდაციები კარანტინში მყოფებისთვის
• როგორ უნდა გაიკეთოთ, გამოიყენოთ და გადააგდოთ ნიღაბი
• როგორ დავიბანოთ ხელები სწორად კორონავირუსისგან დასაცავად.