დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

თბილისის მერის, კახი კალაძის განცხადებით, მერიის რაიონული მომსახურების ცენტრები დროებით მომსახურებას აჩერებს. ფუნქციონირებას მხოლოდ ცენტრალური სერვისცენტრი განაგრძობს და მისი პერსონალი უკონტაქტო მომსახურებაზე გადავა. ამ თემაზე კახი კალაძემ სპეციალურ ბრიფინგზე ისაუბრა.

"ახალი წესის თანახმად, მისაღებში აღარ მოხდება მოქალაქეთა თავშეყრა, ისინი რიგს დაიკავებენ გარეთ და მხოლოდ რამდენიმე ადამიანს ექნება შესაძლებლობა ერთდროულად შემოვიდეს მისაღებში. მათ პერსონალის ნაცვლად დახვდებათ თემატური ბლანკები და შესაბამის თემატურ ყუთებში განათავსებენ. ამას ჩვენი სამსახურის თანამშრომლები გაეცნობიან და თითოეულ შემოსულ წერილზე ექნებათ რეაგირება", — თქვა კახი კალაძემ.

მერის განცხადებით, ჯანდაცვისა და სიცილიური უზრუნველყოფის მიმართულებით თანამშრომლები ვერ ახერხებენ სრულად უკონტაქტო სერვისების მიწოდებას. მისი თქმით, მათ ხშირად უწევთ მოქალაქეებს წერილისა და განცხადების დაწერაში დაეხმარონ. მერის განმარტებით, ამ მიზნით მერიის შენობის პირველ სართულზე გამოიყოფა სპეციალური იზოლირებული სივრცე, სადაც მოქალაქეებს უსაფრთხოების ნორმების სრული დაცვით მოემსახურებიან.

ეპიდსიტუაცია საქართველოში: შეზღუდვები და რეკომენდაციები

18 მარტის მდგომარეობით, საქართველოში კორონავირუსი დაუდასტურდა 38 ადამიანს, მათ შორის 4 ბავშვია. ამასთან, დადასტურებულ შემთხვევებს შორის ერთი, N1 ინფიცირებული უკვე გამოჯანმრთელდა და ის საავადმყოფოდან 14-დღიანი თვითიზოლაციის რეკომენდაციით გაწერეს. კარანტინის რეჟიმში რჩება 1 261 ადამიანი, სტაციონარში მეთვალყურეობის ქვეშ — 216.

დაავადებათა კონტროლის ცენტრის დირექტორის განცხადებით, ამ ეტაპზე სიტუაცია კონტროლდება, თუმცა, შესაძლოა, მომდევნო კვირას ინფექციის პირველწყარო ვეღარ დაადგინონ. ჯანდაცვის მინისტრის განმარტებით, ასეთ შემთხვევაში, შესაძლოა, დაავადებულთა რაოდენობა 80-100-მდე გაიზარდოს და პიკური მომენტი დადგეს. ინფიცირების რისკის ზრდის შემთხვევაში, მთავრობა შეზღუდვების გამკაცრებას გეგმავს და კარანტინის გამოცხადებას არ გამორიცხავს.

რაც შეეხება მოქმედ შეზღუდვებს, ყველა მეზობელ ქვეყანასთან მოქალაქეთა მიმოსვლა შეზღუდულია, ასევე, 2 კვირით საზღვარი დაკეტილია უცხო ქვეყნების მოქალაქისთვის. ყველა სახელმწიფო და კერძო დაწესებულებას დისტანციურ რეჟიმში მუშაობის რეკომენდაცია აქვს მიცემული, მათ შორის, კაფე-ბარებსა და რესტორნებს. აკრძალულია სამარშრუტო ტაქსების გადაადგილება და სრულად შეზღუდულია სპორტ დარბაზებისა და სპა ცენტრების ფუნქციონირება. ასევე, 70 წელს ზევით მოქალაქეებს თვითიზოლაციაში დარჩენა ურჩიეს.

შეზღუდვები შეეხოთ ჟურნალისტებსაც, პარლამენტში მათ მხოლოდ კონკრეტული ლოკაციებიდან მუშაობის უფლება აქვთ, მთავრობის ბრიფინგებზე კი მათი დაშვება აიკრძალა. მედიები ბრიფინგის საერთო სიგნალს მიიღებენ და კითხვებს წინასწარ გაგზავნიან.

მთავრობის გადაწყვეტილებით, შსს აკონტროლებს უცხოეთიდან ჩამოსულ, იზოლაციაში მყოფ ყველა პირს და დარღვევის შემთხვევაში ისინი იძულებით კარანტინში გადაჰყავს. ამ ეტაპზე იძულებით კარანტინშია გადაყვანილი 99 ადამიანი. პარლამენტი განიხილავს, რომ თვითიზოლაციის წესების დარღვევა დასჯადი გახდეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: