სემეკში თელასისა და ენერგოპროჯორჯიასთვის ტარიფის დადგენის მიზნით, საჯარო ადმინისტრაციული წარმოება მიმდინარეობს, თუმცა, როგორც ცნობილია კომპანიები ამ დროისთვის ტარიფის მომატებას არ ითხოვენ.

შეკითხვაზე, გაიზრდება თუ არა ელექტროენერგიის ტარიფი, ენერგეტიკის მინისტრმა, ილია ელოშვილმა განმარტა, რომ ამ ეტაპზე მსგავსი ცვლილება არ იგეგმება:

"ეს, რა თქმა უნდა, მარეგულირებელი კომისიის პრეროგატივაა. ჩვენ ვცდილობთ, რომ არ ჩავერიოთ, არ არის ეს ჩვენს უფლებებში. მაგრამ ჩვენ რასაც ვხედავთ, ჯერჯერობით, ამის წინაპირობა არ არსებობს".

როგორც კანონმდებლობით არის დადგენილი, ელექტროენერგიაზე მომავალი წლის ტარიფი მიმდინარე წლის 31 დეკემბრამდე უნდა დაადგინონ. აღნიშნულს ადასტურებს წყალმომარაგებისა და ენერგეტიკის მარეგულირებელი კომისიის წევრი, გოჩა შონიაც და ამბობს, რომ ამ ეტაპზე მიმდინარე პროცედურას ყოველწლიური ხასიათი აქვს:

"საუბარია იმაზე, თუ რა ვადა უნდა იყოს მოსაზრებების წარმოსადგენად, თუ როგორი უნდა ყოს ბოლო ვადა ტარიფის მისაღებად და ა.შ. ტარიფის გადახედვას უბრალოდ ითხოვს მოქმედი კანონმდებლობა, ისინი ვალდებულები არიან ყოველწლიურად წარმოადგინონ სატარიფო განაცხადები კომისიაში".