აშშ-ის სახელმწიფო დეპარტამენტმა მსოფლიოში ადამიანის უფლებათა შესახებ ანგარიში გამოაქვეყნა, სადაც ცალკე თავი აქვს დათმობილი საქართველოში ადამიანის უფლებების კუთხით არსებულ პრობლემებსაც.

ადამიანის უფლებების დაცვის კუთხით საქართველოზე ანგარიშში ვკითხულობთ, რომ ხელისუფლებამ ადამიანის უფლებათა ზოგიერთ დარღვევაზე არასათანადო ზომები მიიღო. ხელისუფლების მხრიდან არასაკმარის ძალისხმევაზე საუბრისას კი, ნახსენებია 2017 წელს აზერბაიჯანელი ჟურნალისტის, აფგან მუხტარლის გატაცების საქმე.

ანგარიშში ყურადღება ეთმობა 2018 წლის საპრეზიდენტო არჩევნებს და ნათქვამია, რომ პირველი ტური კონკურენტული იყო, თუმცა მეორე ტურში არსებული უთანასწორობა შემაშფოთებელი იყო.

გარდა ამისა, ანგარიშში შეფასებულია 2019 წლის მოვლენებიც. მათ შორის 20-21 ივნისის მოვლენები, სადაც პოლიციის მხრიდან ჟურნალისტებისა და დემონსტრანტების მიმართ გადამეტებული ძალის გამოყენებაზეა საუბარი.

საქართველოში ადამიანის უფლებების შეფასებისას საუბარია ლგბტ ადამიანების უფლებებზე და მათ წინააღმდეგ ძალადობასა და მუქარაზე.

მედიის თავისუფლებასთან დაკავშირებით საუბარია აჭარის საზოგადოებრივ მაუწყებელსა და რუსთავი 2-ზე.

ასევე, ანგარიშში მნიშვვნელოვანი ადგილი ეთმობა მართლმსაჯულების სისტემასა და "პოლიტიკურად მოტივირებულ" საქმეებს. მათ შორის მოხვდა: თიბისი ბანკის დამფუძნებლების, ტვ პირველის მფლობელის მამის, რუსთავი 2-ის ყოფილი დირექტორის, ირაკლი ოქრუაშვილისა და ზუგდიდის მე-6 სკოლის დირექტორის, ია კერზაიას საქმეები.

სახელმწიფო დეპარტამენტი აფასებს საოკუპაციო რეჟიმის მიერ ადამიანთა უფლებების დარღვევებს და საქართველოს ტერიტორიიდან ადამიანთა უკანონო გატაცებასა და დაკავებებს. ასევე საუბარია ოკუპირებულ ტერიტორიებზე მომხდარ მკვლელობებზეც. რაზეც აშშ-ს სახელმწიფო დეპარტამენტი პასუხისმგებლობას რუსეთსა და საოკუპაციო რეჟიმებს აკისრებს.