განახლება: ჯანდაცვის მსოფლიო ორგანიზაციისა და დაავადებათა კონტროლის მსოფლიო ორგანიზაციის ინფორმაციის მიხედვით, ვირუსი ყველაზე გადამდები მაშინაა, როდესაც სიმპტომები ყველაზე მეტადაა გამოხატული, თუმცა გარკვეული გადაცემა, შესაძლოა, სიმპტომების გამოჩენამდეც მოხდეს. On.ge-სთან საუბარში პაატა იმნაძე განმარტავს, რომ მსგავსი შემთხვევები 100 000-ში რამდენიმეა და მხოლოდ გამონაკლის შემთხვევაშია შესაძლებელი. მისივე თქმით, წესით ვირუსი სიმპტომების გამოვლენამდე არ გადადის, მაგრამ ასევე გამონაკლისის შემთხვევებში, შესაძლოა, ის სიმპტომების გაჩენამდე ერთი დღით ადრეც გადამდები იყოს.
"მედიცინაში 100%-იანი არაფერი არ არსებობს, გამონაკლისები ყოველთვის არის", — განაცხადა მან.

დაავადებათა კონტროლის ცენტრის დირექტორის მოადგილის, პაატა იმნაძის განცხადებით, კორონავირუსით ინფიცირებული ადამიანი გადამდები არ არის იქამდე, სანამ მას სიმპტომები არ დაეწყება.

"კიდევ მნიშვნელოვანი ის არის, რომ ადამიანი გადამდები არ არის, სანამ არ დაეწყება სიმპტომები, ყველაზე უფრო გადამდები ადამიანი არის, როდესაც მას ხველა დაეწყება. მანამდე ადამიანი გადამდები არ არის", — განაცხადა იმნაძემ მაესტროს ეთერში.

იმნაძე, ასევე, განმარტავს, რომ იზოლაციაში ან კარანტინში მყოფი ადამიანების ნაწილს რადგან საწყის ეტაპზე სიმპტომი არ აქვს ან ტესტის შედეგები უარყოფითია, ჰგონია, რომ ინფიცირებულები არ არის. მისი თქმით, ეს შეცდომაა, რადგან ტესტი დადებით შედეგს, მხოლოდ სიმპტომების გამოვლენის შემდეგ აჩვენებს.

"ადამიანი უსიმპტომო თუ იქნება, პასუხი იქნება, რა თქმა უნდა, უარყოფითი. ტესტი დადებითი ხდება, მხოლოდ იმ დროს, როდესაც ვირუსი გამოავლენს ორგანიზმში თავს, ანუ დაიწყება კლინიკური ნიშნები.

ამ ეტაპზე საქართველოში კორონავირუსით ინფიცირების 23 შემთხვევაა დადასტურებული. პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: